मुसतान PAK vs ENG 1st Test : मुलतानमध्ये शुक्रवारी यजमान पाकिस्तान क्रिकेट संघाचा एक डाव आणि 47 धावांनी पराभव करुन इंग्लंडनं इतिहास रचला. पहिल्या डावात 500 हून अधिक धावा करुनही एखाद्या संघाला डावाच्या फरकानं पराभवाचा सामना करावा लागण्याची कसोटी क्रिकेटच्या इतिहासात ही पहिलीच वेळ आहे. पाकिस्ताननं पहिल्या डावात 556 धावा केल्या होत्या तर दुसऱ्या डावात त्यांना केवळ 220 धावा करता आल्या. दुसरीकडं, इंग्लंड संघानं 823 धावांवर 7 गडी गमावून पहिला डाव घोषित केला. दोन डावात फलंदाजी करुनही पाकिस्तान संघाला ही धावसंख्या गाठता आली नाही आणि मालिकेत 1-0 अशी पिछाडी झाली. या पराभवासह पाकिस्तान क्रिकेटच्या नावावर एक लाजिरवाणा विक्रमही जमा झाला आहे. 147 वर्षांच्या कसोटी क्रिकेटच्या इतिहासात इतर कोणत्याही संघाला असा पराभवाचा सामना करावा लागला नाही.
पाकिस्तान क्रिकेटसाठी सर्वात लाजिरवाणा दिवस : या सामन्याच्या पहिल्या डावात पाकिस्तान संघानं 556 धावा केल्या होत्या. अशा स्थितीत त्यांनी सामन्याची सुरुवात अतिशय शानदार पद्धतीनं केली. सामन्याचे पहिले साडेतीन दिवस सामना अनिर्णितेच्या दिशेनं जात होता, मात्र चौथ्या दिवसाच्या शेवटच्या सत्रापासून सामन्यानं असं वळण घेतलं की, पाकिस्तानला एक डाव आणि 47 धावांनी पराभव स्वीकारावा लागला. आम्ही तुम्हाला सांगतो, कसोटी क्रिकेटच्या 147 वर्षांच्या इतिहासात ही पहिलीच वेळ आहे की, पहिल्या डावात 500 हून अधिक धावा केल्यानंतरही एखाद्या संघानं कसोटी सामना एका डावानं गमावला आहे.
इंग्लंड संघाची दमदार कामगिरी : 556 धावांच्या प्रत्युत्तरात इंग्लंडनं 150 षटकांत 823 धावांचा हिमालय उभा करत करत पहिला डाव घोषित केला. अशाप्रकारे इंग्लंडने पहिल्या डावात 267 धावांची आघाडी घेतली. पण या सपाट खेळपट्टीवर पाकिस्तानचा दुसरा डाव केवळ 220 धावांवर आटोपला, त्यामुळं त्यांना डावानं पराभवाला सामोरं जावं लागलं. खेळाच्या शेवटच्या दिवशी पाकिस्ताननं 152 धावांच्या पुढं खेळायला सुरुवात केली आणि त्यांच्या हातात 4 विकेट शिल्लक होत्या. पण पाकिस्तान संघ पाचव्या दिवशी मैदानावर एक सत्रही टिकू शकला नाही.
जो रुट आणि हॅरी ब्रूक इंग्लंडच्या विजयाचे नायक : या सामन्यात जो रुट आणि हॅरी ब्रूक यांनी पाकिस्तानी गोलंदाजांची धुलाई केली. जो रूटने पहिल्या डावात 262 धावा केल्या, तर हॅरी ब्रूकनं त्रिशतक झळकावत 317 धावा केल्या. तसंच तो इंग्लंडसाठी सर्वात जलद त्रिशतक झळकावणारा फलंदाज ठरला. दुसरीकडे, दोन्ही खेळाडूंमध्ये 454 धावांची विक्रमी भागीदारी झाली, जी इंग्लंडसाठी कसोटी क्रिकेटमध्ये कोणत्याही विकेटसाठीची सर्वात मोठी भागीदारी ठरली.