पुणे Vidhansabha Election 2024 : विधानसभा निवडणुकीच्या तोंंडावर राष्ट्रवादी अजित पवार गटाला एक मोठा धक्का बसण्याची शक्यता वर्तवली जात आहे. पिपंरी चिंचवड शहरातील चिंचवड विधानसभेत माजी नगरसेवक प्रशांत शितोळे, मयूर कलाटे, मोरेश्वर भोंडवे, विनोद नढे या चार नगरसेवकांनी पत्रकार परिषद घेऊन बंडाचा एल्गार करणार असल्याचं सांगितलं.
योग्य न्याय मिळाला नाही, तर आम्ही... : भाजपासोबत अजितदादा पवार यांनी युती केल्याने महायुतीची ताकद वाढली, पण अजित पवारांच्या कार्यकर्त्यांना न्याय मिळत नसल्यानं चिंचवड विधानसभेत बंडाची घडी पडल्याचं दिसत आहे. माजी नगरसेवक प्रशांत शितोळे यांनी सांगितलं की, चिंचवड विधानसभा मतदार संघातून अजित पवार गटाला उमेदवारी मिळावी, अशी आमची मागणी आहे. भाजपामध्ये मोठी धुसफूस आहे. चिंचवड विधानसभेच्या ठिकाणी प्रखरपणे आमची भूमिका असल्यानं ही पत्रपरिषद आयोजित केली आहे. या विधानसभा निवडणुकीत योग्य न्याय मिळाला नाही, तर आम्ही आणि इतर वीस नगरसेवक बंड करून आम्ही आमची भूमिका मांडू. अजित पवारांनी मित्रपक्ष भाजपाकडे आग्रह धरून ही जागा आपल्याकडे घ्यावी. अन्यथा आम्ही वीसपेक्षा जास्त नगरसेवक पर्यायी मार्ग निवडून निवडणुक लढवू." लवकरच संगनमतानं निर्णय घेत, नवा चेहरा चिंचवड विधानसभेत दिसेल व लवकरच तो जाहीर केला जाईल, असंही या पत्रकार परिषदेत सांगण्यात आलं.