नारायण राणे यांना सलग तिसऱ्यांदा पराभूत व्हावं लागेल : विनायक राऊत - Lok Sabha Election 2024

Vinayak Raut VS Narayan Rane : रत्नागिरी सिंधुदुर्ग लोकसभा मतदारसंघात केंद्रीय मंत्री नारायण राणे (Narayan Rane) यांना तिसऱ्यांदा चितपट करण्याची संधी मला लाभणं हे माझं भाग्य समजताे, असं वक्तव्य ठाकरे गटाचे खासदार विनायक राऊत (Vinayak Raut) यांनी केलंय. ते चिपळूणमध्ये बोलत होते.

रत्नागिरी Vinayak Raut VS Narayan Rane : चिपळूणमध्ये आज (5 एप्रिल) इंडिया आघाडीचा निर्धार मेळावा पार पडला. रत्नागिरी-सिंधुदुर्ग लोकसभा मतदारसंघातील महाविकास आघाडीचे उमेदवार आणि ठाकरे गटाचे खासदार विनायक राऊत (Vinayak Raut) यांच्यासह काँग्रेस, राष्ट्रवादी कॉंग्रेस आणि शिवसेनेच्या (ठाकरे गट) स्थानिक नेत्यांची यावेळी उपस्थिती होती. तसंच मोठ्या संख्येनं कार्यकर्ते देखील यावेळी उपस्थित होते. यावेळी बोलत असताना विनायक राऊत यांनी केंद्रीय मंत्री नारायण राणे (Narayan Rane) यांच्यावर जोरदार टोलेबाजी केली.

काय म्हणाले विनायक राऊत :या मेळाव्यानंतर प्रसार माध्यमांशी संवाद साधत असताना विनायक राऊत म्हणाले की, "आमच्यासमोर कोणीही येऊदेत, किमान अडीच लाखाच्या फरकानं त्याला आपटणार. तसंच महायुतीचा उमेदवार 12 तारखेपर्यंत ठरला तरी पुष्कळ आहे", असा टोला राऊत यांनी लगावला. किरण सामंत हे माझ्यासाठी आव्हानात्मक ठरले असते, नारायण राणे हे माझ्यासाठी आव्हान नाही. राणे यांना तिसऱ्यांदा चितपट करण्याची संधी मला लाभणं हे माझं भाग्य आहे. नारायण राणे यांना सलग तिसऱ्यांदा पराभूत व्हावं लागेल", असं भाकीतही यावेळी राऊत यांनी वर्तवलं.

देवेंद्र फडणवीसांना विरोध :पुढं राऊत म्हणाले की, "कोकणात उपमुख्यमंत्री देवेंद्र फडणवीस (Devendra Fadnavis) सिडको आणून जमीन लाटू पाहत आहेत. त्याला आमचा विरोध कायम राहणार आहे." तसंच हार्मोनियमचे महत्व निलेश राणे यांना कळणार नाही, राडेबाज विकृतीचं महत्व त्यांना चांगलं कळतं, असं म्हणत विनायक राऊत यांनी नारायण राणे यांचे पुत्र निलेश राणे यांच्यावरही हल्लाबोल केला.

लोकसभा निवडणुकीत कोकणात राऊत आणि राणे यांचा पारंपरिक विरोध आहे. विशेषतः राणेंनी शिवसेना सोडल्यापासून त्यांचा हा विरोध नेहमीच दिसून आला आहे. आता या निवडणुकीत काय होतं ते पाहणं औत्सुक्याचं ठरणार आहे.

हेही वाचा :