मुंबई - गेल्या काही दिवसांपासून बॉलिवूड ड्रामा क्वीन राखी सावंत तिच्या तिसऱ्या लग्नामुळे खूप चर्चेत आहे. पाकिस्तानी अभिनेता दोदी खाननं इन्स्टाग्रामवर एक व्हिडिओ शेअर केला होता, यामध्ये त्यानं राखीला लग्नासाठी प्रपोज केलं होतं. तसेच राखीनं देखील अनेक मुलाखतींमध्ये सांगितलं होतं की, ती दोदीशी लग्न करणार आहे. तिचं लग्न पाकिस्तानमध्ये होईल तर रिसेप्शन भारतात होणार, याबद्दल तिनं तिच्या चाहत्यांना माहिती दिली होती. दरम्यान पाकिस्तानी कलाकार दोदीनं यू-टर्न घेतला आहेत, त्यानं राखीला फ्रेंड झोनमध्ये ठेवलं आहे. इंस्टाग्रामवर दोदीनं एक व्हिडिओ शेअर केला आहे, यामध्ये त्यानं म्हटलं आहे की, तो राखीशी लग्न करू शकत नाही, कारण त्याला अनेकजण राखीबरोबर लग्न करत असल्यानं ट्रोल करत आहेत.
दोदी खाननं मारला यू-टर्न : दोदी खाननं इंस्टाग्रामवर व्हिडिओ शेअर करत, म्हटलं की, "अस्सालामु वालेकुम हिंदुस्तान पाकिस्तान, मी दोदी खान...काही दिवसांपूर्वी तुम्ही माझा सोशल मीडियावर एक व्हिडिओ पाहिला होता ज्यामध्ये मी राखी सावंतला लग्नासाठी प्रपोज केलं होतं. तुम्ही हे अगदी बरोबर पाहिलं आहे. राखीला प्रपोज करण्याचं कारण म्हणजे मी तिला खूप चांगलं ओळखतो, ती माझी चांगली मैत्रीण आहे. जेव्हा तिला पाहिलं, तेव्हा ती मला देवावर प्रेम करणारी व्यक्ती वाटली. तिनं आयुष्यात अनेक अडचणींचा सामना केला आहे. तिनं तिचे पालक गमावले आणि आता तिच्या आजारपणात दुःखाबरोबर आहे. तिच्या आयुष्यात एक व्यक्ती आला, त्यानं तिच्याबरोबर काय केलं हे तुम्हाला माहिती आहे. ती एका मोठ्या आघातातून बाहेर आली आहे. तिनं इस्लाम स्वीकारला, उमराह केला, फातिमा नाव ठेवलं, माशाअल्लाह ही खूप मोठी गोष्ट आहे."
दोदी खाननं राखीला बनवणार पाकिस्तानची सून : पाकिस्तानी अभिनेता दोदीनं राखी सावंतशी लग्न न करण्याचे कारण सांगताना पुढं सांगितलं, "मला चांगलं वाटलं मी तिला प्रपोज केलं. मात्र मला वाटते की लोक हे समजू शकत नाहीत. राखीबरोबर मी लग्न करत आहे, हे समजताच मला इतके मेसेज आणि व्हिडिओ पाठविण्यात आले की, मी सहन करू शकलो नाही. राखी, तू माझी खूप चांगली मैत्रीण आहेस. तू दोदी खानची वधू बनू शकणार नाहीस, पण तू पाकिस्तानची सून नक्कीच होशील, हे मी तुला वचन देत आहे. मी तुझे लग्न करून देईल, तुझे लग्न पाकिस्तानामध्ये होईल. मी माझ्या भावाला तुझ्याशी लग्न करायला लावेल." तसेच राखी सावंतनं या व्हिडिओवर कमेंट करून आपले दुःख व्यक्त केले आहे. आता अनेकजण दोदीच्या पोस्टवर कमेंट्स करून आपल्या प्रतिक्रिया देत आहेत. काहीजण आता देखील त्याला सोशल मीडियावर ट्रोल करत आहेत.
हेही वाचा :
