'मुख्यमंत्री माझी लाडकी बहीण योजने'साठी पैसा आहे का? अजित पवारांनी थेटच सांगितलं - Majhi Ladki Bahin Yojana

Majhi Ladki Bahin Yojana : राज्याच्या अर्थसंकल्पात महिलांना आर्थिकदृष्ट्या सक्षम करण्यासाठी 'मुख्यमंत्री माझी लाडकी बहीण योजना' जाहीर करण्यात आली. राज्याची आर्थिक स्थिती बिकट असताना ही योजना राबवणार कशी? असा सवाल विरोधकांनी उपस्थित केला होता. त्यावर आता अजित पवार (Ajit Pawar) यांनी या योजनेसाठी निधीची तरतूद झाल्याचं सांगून विरोधकांची बोलती बंद केली.

मुंबई Majhi Ladki Bahin Yojana : राज्य सरकारनं जाहीर केलेली 'मुख्यमंत्री माझी लाडकी बहीण' योजना निधी अभावी रखडण्याची शक्यता विरोधकांसह अनेक तज्ञांनी व्यक्त केली होती. या योजनेमुळं राज्याच्या तिजोरीवर मोठा आर्थिक भार येणार असल्यानं ती किती काळ चालेल आणि निधी कसा उपलब्ध होईल अशी चिंता व्यक्त करण्यात येत होती. अखेर अर्थमंत्री अजित पवार (Ajit Pawar) यांनी या योजनेसाठी निधीची तरतूद केली असल्याचं स्पष्ट करत, विरोधकांच्या प्रश्नांना पूर्णविराम दिला.

राज्याचा उपमुख्यमंत्री आणि अर्थ व नियोजन मंत्री म्हणून मी स्वतःच ‘मुख्यमंत्री माझी लाडकी बहीण’ योजना राज्याच्या वर्ष 2024-25 च्या अतिरिक्त अर्थसंकल्पात सादर केली आहे. वित्त व नियोजन, सर्व संबंधित विभाग तसेच राज्य मंत्रिमंडळाच्या मान्यतेनंतरच या योजनेची घोषणा मी राज्याच्या अर्थसंकल्पात केली.- अजित पवार, अर्थमंत्री

वित्त विभागाचा विरोध असल्याची बातमी खोटी : "या संदर्भातील बातम्या वस्तुस्थितीशी विसंगत आहेत. त्या राजकीय हेतूने प्रेरित केल्या जात आहेत. प्रसारमाध्यमांनीही अशा बातम्या देणं कृपया थांबवावे. या योजनेवर रक्कम खर्च करण्याची राज्य शासनाची तयारी आहे. त्यामुळं 'मुख्यमंत्री माझी लाडकी बहीण योजने'ला या राज्यातील कुणाचाही विरोध असण्याचे कारण नाही, असूच शकत नाही," अशी पोस्ट अजित पवार यांनी 'एक्स'वर शेयर केली.

३५ हजार कोटींची तरतूद : "या योजनेसाठी चालू आर्थिक वर्षात आवश्यक एकूण 35 हजार कोटी रुपयांच्या संपूर्ण रक्कमेची तरतूद अर्थसंकल्पात केली आहे. त्यामुळं या योजनेसाठी पैसा कुठून आणणार? हा प्रश्नच उद्भवत नाही. तसेच महाराष्ट्रासारख्या आर्थिक संपन्न राज्याला एवढी रक्कम खर्च करणं शक्य आहे. वास्तविक, अर्थसंकल्पात 25 हजार कोटींची तरतूद करण्यात आली होती. मात्र, आता ही 35 हजार कोटींची तरतूद आहे," असं अजित पवार यांनी स्पष्ट केलं.

माता- भगिनींसाठी रक्कम : "राज्यातील माता-भगिनी-मुलींच्या आर्थिक स्वातंत्र्य, स्वावलंबन, पोषण व सर्वांगीण सक्षमीकरण, मान-सन्मान आणि स्वाभिमान वाढवण्यासाठी ही रक्कम खर्च करण्याची राज्य शासनाची तयारी आहे. त्यामुळं 'मुख्यमंत्री माझी लाडकी बहीण योजने'ला या राज्यातील कुणाचाही विरोध असण्याचं कारण नाही," असं म्हणत अजित पवार यांनी विरोधकांच्या प्रश्नाला उत्तर दिलं.

हेही वाचा -