मुंबई Campaigning On Social Media : लोकसभा निवडणूक 2024 च्या पहिल्या टप्प्यातील मतदान प्रक्रिया शुक्रवारी (19 एप्रिल) विदर्भात पार पडणार आहे. बुधवारी पहिल्या टप्प्यातील लोकसभा मतदार संघातील प्रचार संपुष्टात आला. मात्र, लोकसभा निवडणुकीच्या प्रचारादरम्यान लोकांचा आणि मतदारांचा प्रतिसाद कमी असल्याचं पहायला मिळालं. तसंच यंदा रस्त्यावरील प्रचारापेक्षा पक्ष पदाधिकार्‍यांकडून सोशल मीडियाचा मोठ्या प्रमाणात वापर केला जात आहे.
लोकसभा निवडणुकीच्या पहिल्या टप्प्यातील मतदान प्रक्रिया उद्या पार पडणार असून त्यासाठी प्रशासन सज्ज झालंय. मात्र, असं असतानाच राज्यातील फुटलेला शिवसेना आणि राष्ट्रवादी काँग्रेस पक्ष तसंच काँग्रेस पक्षातील काही दिग्गजांनी भाजपात घेतलेली उडी, यासर्वांचा मोठा फटका उमेदवारांच्या प्रचाराला बसल्याचं बोललं जातंय. त्यामुळंच रस्त्यावरील प्रचार कॅम्पिंग आता सोशल मीडियाच्या माध्यमातून मोठ्या प्रमाणात बघायला मिळतंय.
नेत्यांच्या निर्णयामुळं कार्यकर्ते द्विधा मनस्थितीत : एका बाजूला राज्यात लोकसभा निवडणुकीला रंगत चढत आहे, तर दुसऱ्या बाजूला महाराष्ट्रात पहिल्यांदा अशा प्रकारची परिस्थिती निर्माण झाली आहे की, ग्रासरूटवरील कार्यकर्ते प्रचारात उतरताना दिसत नाहीये. याचं कारण म्हणजे ज्या पक्षाच्या विचारधारा, नेत्यांविरुद्ध आजपर्यंत लढलो त्यांचाच प्रचार करण्याची वेळ आज कार्यकर्त्यांवर येऊन ठेपली आहे. पक्षाचे वरिष्ठ नेते केव्हा एकमेकांविरोधात जातील आणि कधी एकत्र येतील याविषयी कार्यकर्त्यांच्या मनात शंका असल्याचं, राजकीय विश्लेषक आनंद गायकवाड म्हणाले. राज्यामध्ये महाविकास आघाडी आणि महायुती निर्माण होण्यापूर्वी घटक पक्षातील नेते एकमेकांच्या विरोधात प्रचार करत होते. त्यामुळं महाविकास आघाडी आणि महायुतीतील कार्यकर्ते सध्या द्विधा मनस्थितीत असल्यानं प्रचारात जो माहोल हवा होता तो दिसत नाहीये.
पुढील टप्प्यात रंगत वाढेल : यासंदर्भात प्रतिक्रिया देत अजित पवार राष्ट्रवादी काँग्रेस पक्षाचे नेते, राज्याचे पुनर्वसन मंत्री अनिल पाटील म्हणाले की, मुळात महाराष्ट्रातील तापमानाचा विचार केला पाहिजे. पाच टप्प्यात निवडणुका पार पडणार आहे. जस जसे उमेदवारांचे अर्ज दाखल होतील, त्याप्रमाणे निवडणूक प्रचारात रंगत वाढेल. त्यासोबत कार्यकर्त्यांची सक्रियता देखील वाढेल, असा विश्वास अनिल पाटील यांनी व्यक्त केला.