प्रदेशाध्यक्ष झाल्यानंतर हर्षवर्धन सपकाळ यांची पहिली प्रतिक्रिया; म्हणाले...

बुलढाणा : गेल्या अनेक दिवसांपासून नाना पटोले यांना महाराष्ट्र काँग्रेसच्या प्रदेशाध्यक्षपदावरून दूर करण्यात येणार असल्याची चर्चा सुरू होती. असं असतानाच गुरुवारी (13 फेब्रुवारी) नाना पटोले यांच्याकडील काँग्रेस प्रदेशाध्यक्ष पदाची जबाबदारी हर्षवर्धन सपकाळ यांच्याकडं सोपवण्यात आली. हर्षवर्धन सपकाळ हे काँग्रेसचे निष्ठावान कार्यकर्ते आहेत. तसंच ते गांधी परिवाराचे अत्यंत जवळचे सहकारी मानले जातात. नियुक्तीनंतर प्रसारमाध्यमांशी संवाद साधताना हर्षवर्धन सपकाळ म्हणाले की, "मी एका सर्वसामान्य कुटुंबातील असून कुठलाही राजकीय वारसा नसताना एका सामान्य कार्यकर्त्याला पक्षानं फार मोठी संधी दिली आहे. या संधीचं मी निश्चित सोनं करेन. एका हातात संविधान आणि दुसऱ्या हातात भारताची संस्कृती आम्ही पुढं घेऊन जाणार आहोत," असंही ते यावेळी म्हणाले.