मुंबई - Rajanikanth : रजनीकांतचे जगभर चाहते आहेत. अनेक सेलेब्रिटींचेही तो समोर पाहिल्यानंतर भान हरपते. हीच अवस्था अनुपम खेरचीही झाल्याचं पाहायला मिळालं. अलिकडेच दिल्लीत रजनीकांत आणि अनुपम खेरची भेट झाली. तेव्हा त्यानं त्याच्याबरोबर एक व्हिडिओ बनवला. त्यानं शेअर केलेल्या या व्हिडिओला त्यानं "रजनीकांत ही देवानं मानवजातीला दिलेली भेट" असल्याचं म्हटलं आहे.
अलीकडेच पंतप्रधान नरेंद्र मोदी यांच्या शपथविधी सोहळ्यासाठी रजनीकांत दिल्लीत आला होता. 9 जून रोजी राष्ट्रपती भवनात झालेल्या पंतप्रधान मोदींच्या शपथविधी सोहळ्याला रजनीकांत आणि अनुपम खेर उपस्थित होते. या शपथविधी समारंभाच्या दरम्यान अनुपम खेर आणि रजनीकांत यांची भेट झाली. त्यांच्या दिल्ली भेटीचा एक व्हिडिओ त्यानं पोस्ट केला आहे.
व्हिडीओमध्ये अनुपम खेर रजनीकांतच्या बरोबर रस्त्यावरुन चालताना दिसत आहे. "मिस्टर रजनीकांत. द वन अँड ओन्ली. द गॉड्स गिफ्ट टू मॅनकाईंड.", असं म्हणत अनुपम खेर रजनीचं कौतुक करताना व्हिडिओत दिसत आहे. अनुपम खेरची सुरू असलेली प्रशंसा करण्याची ही धडपड पाहून रजनीकांतही हसताना दिसत आहे. क्लिप शेअर करताना अनुपमने लिहिले, "मानवजातीला देवाची देणगी! एकमेव - रजनीकांत! जय हो!"
हा व्हिडीओ शेअर होताच चाहत्यांनी कमेंट सेक्शनमध्ये भरपूर प्रतिक्रिया दिल्या आहेत. एका युजर्सने लिहिले की, "हो, गॉड्स गिफ्ट जसे तू म्हणालास, तो माझ्या आवडत्या कलाकारांपैकी एक आहे." आणखी एका युजरने कमेंट केली की, "तुम्ही दोघेही देवाची भेट आहात."