पत्नीची हत्या करून पतीनंही संपवलं जीवन; सात महिन्यांपूर्वी झाला होता प्रेमविवाह

अमरावतील एका फार्म हाऊसमध्‍ये वास्‍तव्‍यास असलेल्‍या पती-पत्‍नीचे मृतदेह आढळून आल्‍यानंतर एकच खळबळ उडाली.

अमरावती : सात महिन्यांपूर्वी आंतरजातीय विवाह करून सुखी संसाराची स्वप्नं रंगविणाऱ्या एका दांपत्याचा आज दुर्दवी शेवट झाला. पत्नीची गळा आवळून तिची हत्या केल्यानंतर स्वतः पतीनेसुद्धा आत्महत्या करून जीवन संपवील्याचा धक्कादायक प्रकार रहाटगाव येथील प्रज्ज्वल पात्रे यांच्या शेतात घडला. अमोल सुरेशराव गायकवाड (३५), आणि शिल्पा अमोल गायकवाड (३२) असं घटनेतील मृतकांची नावे आहेत.

अशी समोर आली आहे घटना : मूळचे धामणगाव तालुक्यातील वाठोडा आणि सध्याचे रहाटगाव येथील रहिवासी अमोल सुरेशराव गायकवाड आणि रामगाव येथील शिल्पा अमोल गायकवाड यांचा सात महिन्यांपूर्वी आंतरजातीय विवाह झाला होता. कल्पदीप मंगलकार्यालय मागे असलेल्या जिल्हा पुरवठा कार्यालयातील पुरवठा निरिक्षक प्रज्वल विठ्ठलराव पात्रे यांच्या शेतात अमोलचे वडील रखवालदारी आणि मजुरी करत होते. त्याठिकाणी असलेल्या दुमजली फार्म हाऊसमध्ये अमोल आणि शिल्पा तसेच अमोलचे वडील सुद्धा वास्तव्यास होते. दोन दिवसांपूर्वी अमोलचे वडील बाहेरगावी गेले होते आणि रविवारी सकाळी परत आल्यानंतर त्यांनी मुलगा आणि सुनेला आवाज दिला. मात्र, त्यांना प्रतिसाद न मिळाल्यानं अमोलच्या वडिलांनी खोलीत जाऊन बघितलं तर खोलीत पलंगावर शिल्पाचा मृतदेह दिसला तर अमोलचा फासावर अडकलेला मृतदेह आढळला. अशी माहिती पोलीस निरीक्षक महेंद्र अंभोरे यांनी दिली.

पोलिस करत आहे तपास : या घटनेची नांदगाव पेठ पोलीस स्टेशनचे ठाणेदार महेंद्र अंभोरे यांना माहिती मिळताच ते देखील आपल्या ताफ्यासह घटनास्थळी पोहचले. श्वान पथक आणि फॉरेन्सीक टीमला सुध्दा यावेळी पाचारण करण्यात आले. पोलीस उपायुक्त सागर पाटील, फ्रेजरपुरा विभागाचे एसीपी कैलास पुंडकर हे सुध्दा घटनास्थळी दाखल झाले. पोलिसांनी घटनास्थळ पंचनामा करून शिल्पा आणि अमोलचा मृतदेह उत्तरीय तपासणीसाठी जिल्हा सामान्य रुग्णालयात पाठवलं. घटनेबाबत प्रमुख कारण अद्याप स्पष्ट नाही. अमोलने शिल्पाची हत्या का केली असावी? स्वतः गळफास का घेतला? की अजून काही घातपात झाला याबाबत सर्वच बाजूने पोलीस तपास करत आहेत, असं पोलीस निरीक्षक महेंद्र अंभोरे यांनी सांगितलं. तर पुढील तपास पीएसआय कवडे करत आहेत.

हेही वाचा -