मुंबई - Naga Chaitanya-Sobhita Dhulipala : नागा चैतन्यनं 2021 मध्ये सामंथा रुथ प्रभूला घटस्फोट दिला, त्यानंतर त्यानं अभिनेत्री शोभिता धुलिपालाला डेट करायला सुरुवात केली. नागा चैतन्य आणि शोभिताच्या डेटिंगच्या बातम्या बऱ्याच दिवसांपासून येत होत्या. नागा चैतन्य शोभिता धुलिपालाबरोबर लग्न करण्याच्या तयारीत आहे. नागा चैतन्यच्या जवळच्या सूत्रांनी पुष्टी केली आहे की, लग्नाच्या योजनांना अंतिम रूप देण्यासाठी दोन्ही कुटुंबे आज एकांतात भेटतील. अक्किनेनी कुटुंबाचे चाहते अधिकृत घोषणेची आतुरतेनं वाट पाहत आहेत.
नागा चैतन्य आणि शोभिता धुलिपाला लग्नाच्या तयारीत :सोशल मीडियावर या दोघांच्या लग्नाच्या बातम्या वाऱ्यासारख्या पसरत आहेत. आता अनेकजण सोशल मीडियावर या जोडप्याचं अभिनंदन करताना दिसत आहेत. शोभिता धुलिपालानं 2013 मध्ये फेमिना मिस इंडिया खिताब जिंकला होता. तिनं 2016 मध्ये चित्रपटसृष्टीत प्रवेश केला. तेव्हापासून ती प्रसिद्धीझोतात आली होती. सध्या तिला टॉलीवूड, बॉलीवूड आणि हॉलीवूडमधून ऑफर मिळत आहेत. दुसरीकडे, नागा चैतन्य हा त्याच्या चित्रपटांच्या शूटिंगमध्ये व्यग्र आहे. नागा हा चंदू माँडेटी दिग्दर्शित 'थंडेल' या चित्रपटामध्ये काम करत आहे. दरम्यान अक्किनेनी कुटुंब या जोडप्याच्या लग्नाची लवकरच घोषणा करेल.