मुंबई - T20 World Cup 2024 and Anushka sharma : आयसीसी टी-20 विश्वचषकाच्या अंतिम सामन्यात भारत आणि साऊथ आफ्रिका यांच्यात चुरशीची लढत झाली. भारतीय क्रिकेट संघानं साऊथ आफ्रिकेचा 7 धावांनी पराभव करून दुसऱ्यांदा टी 20 विश्वचषक जिंकला आहे. या सामन्यात विराट कोहलीचं महत्त्वपूर्ण योगदान आहे. टी-20 विश्वचषकाच्या सामन्यादरम्यान एकामागून एक विकेट पडत असताना त्यानं संघाची धुरा सांभाळली होती. भारताच्या विजयाचा आनंद साजरा करताना, बॉलिवूड अभिनेत्री अनुष्का शर्मानं पती विराट कोहली आणि मुलगी वामिकाशी संबंधित एक पोस्ट शेअर केली आहे. अनुष्कानं आपल्या मनातील भावना चाहत्यांबरोबर शेअर केल्या आहेत.
अनुष्का शर्मानं केली भावूक पोस्ट शेअर :अनुष्का शर्मानं विजयानंतर ट्रॉफी उचलताना आणि भावूक झालेल्या खेळाडूंचे फोटो पोस्ट केले. तिन कॅप्शनमध्ये लिहिलं, " जेव्हा आमच्या मुलीनं त्याला (विराट कोहली) टीव्हीवर रडताना पाहिलं, तेव्हा तिला सर्वात मोठी चिंता होती. सगळे त्याला का मिठी मारत आहेत? मी तिला सांगितलं की त्याला दीड अब्ज लोकांनी प्रेम दिलं आहे. किती आश्चर्यकारक विजय आहे? चॅम्पियन्सचं अभिनंदन." यानंतर अनुष्कानं माजी कर्णधार विराट कोहलीचा दुसरा फोटो पोस्ट केला आहे. या फोटोमध्ये विराट कोहली हातात विश्वचषक ट्रॉफी धरून भारतीय तिरंगा घेतलेला दिसत आहे. जवळपास 30 लाख लोकांनी या फोटोला लाईक केले आहे. या फोटोच्या कॅप्शनमध्ये तिनं लिहिलं, "माझे या व्यक्तीवर खूप प्रेम आहे. मी खूप भाग्यवान आहे की, मी तुला माझे कुटुंब म्हणू शकते. आता हे साजरे करण्यासाठी माझ्यासाठी स्पार्कलिंग पाण्याचा ग्लास घेऊन ये!"