मुंबई - Heeramand premiere : दिग्दर्शक संजय लीला भन्साळी यांची आगामी वेब सीरीज 'हिरामंडी' ओटीटीवर धमाल करण्यासाठी सज्ज आहे. या वेब सीरीजच्या रिलीजच्या एक आठवडा आधी निर्मात्यांनी मुंबईत प्रीमियरचे आयोजन केलं होतं. यामध्ये अनेक स्टार्स उपस्थित राहिले. या प्रीमियर दरम्यान अदिती राव हैदरी आणि सिद्धार्थवर अनेकांच्या नजरा होत्या. या जोडप्याचा नुकताच साखरपुडा झाला आहे. त्यामुळे दोघेही सध्या खूप चर्चेत आहे. प्रीमियरमध्ये नवविवाहित जोडपे पुलकित सम्राट-क्रिती खरबंदा, अंकिता लोखंडे-विकी जैन, सुजैन खान आणि तिचा बॉयफ्रेंड अर्स्लन गोनी यांच्यासह अनेक स्टार कपल्स आपल्या स्टाईलिश अंदाजात दिसले.
'हिरामंडी'चा प्रीमियर :अदितीनं एक सुंदर निळ्या रंगाचा प्रिंटेड फ्लोरल अनारकली सूट परिधान केला होता. यावर तिनं मोकळे केस सोडले होते. याशिवाय तिनं हेवी इअररिंग्स घातले होते. दुसरीकडे सिद्धार्थ ब्लॅक रंगाच्या शेरवानीमध्ये दिसला. हे जोडपे स्क्रिनिंगच्या रेड कार्पेटवर हात धरून फोटोसाठी पोझ देत होते. सध्या आदिती आणि सिद्धार्थ त्यांच्या नात्याबद्दल मौन बाळगून आहेत. मात्र त्याच्या लग्नाच्या चर्चा सोशल मीडियावर अनेकदा होताना दिसतात. 2021 मध्ये या जोडप्यानं 'महा समुद्रम'मध्ये काम केलं होतं. यानंतर त्यांची या चित्रपटाच्या सेटवरून प्रेमकहाणी सुरू झाली. आदितीचं पहिलं लग्न अभिनेता सत्यदीप मिश्राबरोबर केलं होतं.