विधानसभा निवडणूक 2024; जम्मू काश्मीरमध्ये सकाळी 11 वाजतापर्यंत 28 टक्के मतदान, शेवटच्या टप्प्यात 40 जागांसाठी 'इतके' उमेदवार मैदानात - Jammu Kashmir Election 2024 Live

Jammu Kashmir Election 2024 Live Update : जम्मू काश्मीरमध्ये आज शेवटच्या टप्प्यातील मतदान पार पडत आहे. विधानसभा निवडणूक 2024 च्या मतदानाची प्रशासनाकडून तयारी पूर्ण झाली आहे. मतदानामुळे आज जम्मू काश्मीरमध्ये तगडी सुरक्षा व्यवस्था तैनात करण्यात आली आहे. सकाळी 11 वाजतापर्यंत 28.12 टक्के मतदान पार पडलं आहे.

श्रीनगर Jammu Kashmir Election 2024 Live Update : जम्मू काश्मीरमध्ये आज विधानसभा निवडणूक 2024 च्या शेवटच्या टप्प्यातील मतदान पार पडणार आहे. थोड्याच वेळापूर्वी मतदानाला सुरुवात झाली असून मतदान केंद्रावर मतदारांच्या रांगा लागल्या आहेत. शेवटच्या टप्प्यात 7 जिल्ह्यातील 40 मतदार संघात आज मतदान पार पडणार आहे. या 40 जागांसाठी तब्बल 1415 उमेदवारांचं भवितव्य आज मतपेटीत बंद होणार आहे. आज सकाळी मतदानाला शांततेत सुरुवात झाली. मतदान केंद्रावर मतदारांच्या लांबच लांब रांगा लागल्या आहेत. पंतप्रधान नरेंद्र मोदी यांनी मतदारांना बाहेर पडून मतदान करण्याचं आवाहन केलं आहे. सकाळीच ज्येष्ठ नेते गुलाम नबी आजाद यांनीही मतदान करुन मतदारांना मतदान करण्याचं आवाहन केलं.

सकाळी 11 वाजतापर्यंत 28.12 टक्के मतदान :जम्मू काश्मीरमध्ये तिसऱ्या टप्प्यातील मतदानाला आज सकाळपासून शांततेत सुरुवात झाली आहे. सकाळी 11 वाजतापर्यंत जम्मू काश्मीरमध्ये 28.12 टक्के मतदान पार पडलं आहे. यात बांदीपोरा 28.04 टक्के, बारामुल्ला 23.20 टक्के, जम्मू 27.15 टक्के, कठुआ 31.78 टक्के, कुपवाडा 27.34 टक्के, सांबा 31.50 टक्के आणि उधमपूर 33.84 टक्के मतदान झालेलं आहे.

काश्मीरमध्ये 370 हटवल्यानंतर पहिल्यांदा होत आहे मतदान :जम्मू काश्मीरमध्ये कलम 370 हटवल्यानंतर पहिल्यांदा सार्वजनिक निवडणूक पार पडत आहे. या निवडणुकीत सगळ्याच राजकीय पक्षांनी मोठी तयारी केली आहे. आज सकाळी मतदानाला सुरुवात झाली असून काश्मीरमधील 39.18 लाखांहून अधिक मतदार 1415 उमेदवारांचं भवितव्य आज मतपेटीत बंद करणार आहेत. जम्मू काश्मीरमधील विधानसभा निवडणूक 2024 तगड्या बंदोबस्तात शांततेत सुरू आहे. उत्तर काश्मीर विधानसभा मतदारसंघात सकाळी 7 वाजता मतदानाला सुरुवात झाली. बांदीपोरा जिल्ह्यातील संबल सोनावरी भागात सकाळपासून शांततेत मतदान सुरू आहे. यावेळी मतदारांनी, "मूलभूत प्रश्न सुटले पाहिजेत म्हणूनच आम्ही पुन्हा मतदान करणार आहोत. आम्ही निवडलेले लोकप्रतिनिधी समस्यांवर तोडगा काढतील, अशी आशा आहे," असं प्रसारमाध्यमांशी बोलताना स्पष्ट केलं.

जम्मू काश्मीरच्या 7 जिल्ह्यातील 40 मतदार संघात मतदान :जम्मू काश्मीरचं विभाजन झाल्यानंतर पहिल्यांदा जम्मू काश्मीरमध्ये सार्वजनिक निवडणूक पार पडत आहे. विधानसभा निवडणूक 2024 साठी प्रशासनानं पूर्ण तयारी केली आहे. आज जम्मू काश्मीरमधील 7 जिल्ह्यातील तब्बल 40 विधानसभा मतदार संघात मतदान पार पडणार आहे. या 40 मतदार संघात मतदानाची तयारी पूर्ण झाली आहे.

हेही वाचा :