ഓൺലൈൻ ട്രേഡിങിന്‍റെ പേരിൽ തട്ടിപ്പ്: വയോധികന് നഷ്‌ടമായത് 13.26 കോടി; മൂന്ന് പ്രതികൾ പിടിയിൽ - ONLINE TRADING SCAM

ഓൺലൈൻ ട്രേഡിങ് തട്ടിപ്പിൽ ഹൈദരാബാദ് സ്വദേശിക്ക് നഷ്‌ടമായത് കോടികൾ. പ്രമുഖ ട്രേഡിങ് കമ്പനികളുടെ പേരിലായിരുന്നു തട്ടിപ്പ്. സംഭവത്തിൽ മൂന്ന് പ്രതികളെ അറസ്റ്റ് ചെയ്‌തു.

ഹൈദരാബാദ്:വയോധികനെ കബളിപ്പിച്ച് കോടികൾ തട്ടി സൈബർ സംഘം. ഹൈദരാബാദ് സ്വദേശിയായ വയോധികനിൽ നിന്നും ഓൺലൈൻ സ്റ്റോക്ക് ട്രേഡിങ് എന്ന വ്യാജേന 13.26 കോടി രൂപയാണ് സംഘം കവർന്നത്. സംഭവത്തിൽ തെലങ്കാന സൈബർ സെക്യൂരിറ്റി ബ്യൂറോ (ടിജിസിഎസ്ബി) മൂന്ന് പേരെ അറസ്റ്റ് ചെയ്‌തു.

വയോധികന് ഓൺലൈൻ സ്റ്റോക്ക് ട്രേഡിങ് ടിപ്പുകൾ വാഗ്‌ദാനം ചെയ്‌തുകൊണ്ട് വാട്ട്‌സ്ആപ്പിൽ സന്ദേശം ലഭിക്കുകയാണ് ആദ്യമുണ്ടായത്. മുമ്പ് ഓഹരി വിപണിയിൽ നിന്ന് ലാഭം നേടിയതിനാൽ അവർ സന്ദേശത്തോട് പ്രതികരിച്ചു. പിന്നീട് പ്രമുഖ ട്രേഡിങ് കമ്പനികളുടെ പേരിലാണ് തട്ടിപ്പ് നടന്നത്.

വാട്ട്‌സ്ആപ്പ് ഗ്രൂപ്പിൽ ജോയിനായ വയോധികന് പ്രമുഖ കമ്പനികളുടെ പ്രതിനിധികളെന്ന വ്യാജേന തട്ടിപ്പുകാർ ഓഹരി വിപണി ഉപദേശം നൽകി. തുടക്കത്തിൽ ചെറിയ ലാഭം കാണിച്ച്, കുറച്ച് പണം പിൻവലിക്കാൻ അനുവദിച്ച് വിശ്വാസ്യത നേടിയെടുത്തിരുന്നു. തുടർന്ന് 13.26 കോടി രൂപ വയോധികൻ നിക്ഷേപിച്ചതോടെ തട്ടിപ്പുകാർ പ്രതികരിക്കാതെയായി.

തുടർന്ന് കബളിപ്പിക്കപ്പെട്ടുവെന്ന് മനസിലാക്കിയ ഇര സെപ്‌തംബർ രണ്ടിന് ടിജിസിഎസ്ബിക്ക് പരാതി നൽകുകയായിരുന്നു. തുടർന്ന് നടത്തിയ അന്വേഷണത്തിലാണ് പ്രതികളെ പിടികൂടുന്നത്. അടുത്തിടെ തെലങ്കാന സ്വദേശിയായ ഡോക്‌ടറിൽ നിന്ന് ഷെയർ ട്രെയിഡിങ്ങിന്‍റെ പേരില്‍ സൈബർ തട്ടിപ്പ് സംഘം 8.6 കോടി രൂപ കവർന്നിരുന്നു. അതിന് പിന്നാലെയാണ് അടുത്ത സംഭവം.

സൈബർ തട്ടിപ്പിന് പിന്നിലെ മുഖ്യ സൂത്രധാരനെ കണ്ടെത്താൻ അന്വേഷണം പുരോഗമിക്കുകയാണ്. ഇത്തരം തട്ടിപ്പുകൾ വർധിക്കുന്നത് കണക്കിലെടുത്ത് തെലങ്കാന സൈബർ പൊലീസ് സൈബർ തട്ടിപ്പുകൾക്കെതിരായ അന്വേഷണം ശക്തമാക്കിയിട്ടുണ്ട്.