തിരുവനന്തപുരം: തിരുവനന്തപുരം വിമാനത്താവളത്തില്‍ അന്തരീക്ഷത്തിലെ നേരിയ വ്യത്യാസങ്ങള്‍ പോലുമളക്കാന്‍ പുത്തന്‍ സാങ്കേതിക വിദ്യയുമായി കൗണ്‍സില്‍ ഓഫ് സയന്‍റിഫിക് ആന്‍ഡ് ഇന്‍ഡസ്ട്രിയല്‍ റിസര്‍ച്ചിന് (CSIR) കീഴിലുള്ള നാഷണല്‍ ഇന്‍സ്റ്റിറ്റ്യൂട്ട് ഫോര്‍ ഇന്‍റര്‍ഡിസിപ്ലിനറി സയന്‍സ് ആന്‍ഡ് ടെക്‌നോളജി (NIIST). സോളാര്‍ സഹായത്തോടെ സ്വയം പ്രവര്‍ത്തിക്കുന്ന ഇന്‍ഡോര്‍ എയര്‍ ക്വാളിറ്റി മോണിറ്ററുകള്‍ തിരുവനന്തപുരം പാപ്പനംകോട് പ്രവര്‍ത്തിക്കുന്ന എന്‍ഐഐഎസ്‌ടി തദ്ദേശീയമായി വികസിപ്പിച്ചതാണ്.
താപനില, മര്‍ദം, അന്തരീക്ഷത്തിലെ കാര്‍ബണ്‍ ഡയോക്‌സൈഡ്, കാര്‍ബണ്‍ മോണോക്‌സൈഡ്, വൊളെറ്റൈല്‍ ഓര്‍ഗാനിക് കോമ്പൗണ്ട്, എയര്‍ ക്വാളിറ്റി എന്നീ നിരീക്ഷിക്കാനുള്ള സെന്‍സറുകള്‍ വഴി ശേഖരിക്കുന്ന വിവരങ്ങള്‍ യാത്രക്കാര്‍ക്ക് മൊബൈല്‍ ആപ്പ് വഴി ലഭ്യമാക്കാനാണ് ലക്ഷ്യമിടുന്നതെന്ന് എന്‍ഐഐഎസ്‌ടിയിലെ ശാസ്ത്രജ്ഞന്‍ ഡോ.റിബിന്‍ ജോസ് അറിയിച്ചു. ചെറിയ തോതിലുള്ള സൂര്യപ്രകാശത്തില്‍ നിന്നും സ്വയം ഊര്‍ജ്ജം ഉത്പാദിപ്പിക്കുന്ന സംവിധാനത്തിലാകും ഇന്‍ഡോര്‍ എയര്‍ ക്വാളിറ്റി മോണിറ്ററുകള്‍ പ്രവര്‍ത്തിക്കുക.