സര്‍ക്കാര്‍ ജോലിയ്ക്കായുള്ള കാത്തിരിപ്പിനൊപ്പം കൃഷിയിടങ്ങളിലും സജീവമായി ഇടുക്കിയിലെ ഒരു കൂട്ടം ചെറുപ്പക്കാര്‍
ഇടുക്കി: സര്‍ക്കാര്‍ ജോലിയ്ക്കായുള്ള കാത്തിരിപ്പിനൊപ്പം കൃഷിയിടങ്ങളിലും സജീവമാവുകയാണ് ഇടുക്കിയിലെ ഒരു കൂട്ടം ചെറുപ്പക്കാര്‍. പിഎസ്‌സി റാങ്ക് ലിസ്‌റ്റില്‍ ഇടംപിടിച്ച യുവാക്കളുടെ കൂട്ടായ്‌മയുടെ നേതൃത്വത്തില്‍ രാജാക്കാട് ഒന്നര ഏക്കര്‍ ഭൂമിയിലാണ് നെല്‍കൃഷി ഇറക്കിയത്. ഹൈറേഞ്ചില്‍ നിന്നും അന്യം നിന്ന് പോയ നെല്‍കൃഷിയെ തിരികെ എത്തിയ്ക്കാനുള്ള ശ്രമത്തിലാണ് ഈ യുവജന കൂട്ടായ്‌മ.
പിഎസ്‌സി പരീക്ഷയ്ക്കായി തയ്യാറെടുക്കുന്നതിന് ഒരുമിച്ച് കൂടിയപ്പോഴാണ്, നെല്‍കൃഷി ഇറക്കുക എന്ന ആശയം ഉരുത്തിരിഞ്ഞത്. രാജാക്കാട്ടിലെ ഒന്നര ഏക്കര്‍ പാടത്ത്, കൃഷിയും ഇറക്കി. അക്ഷയ ഇനത്തില്‍ പെട്ട നെല്ലാണ് വിതച്ചത്. എട്ട് ക്വിന്‍റലോളം ഉത്പാദനവും നേടാനായി.