പുല്ലാട്: ജി ആന്‍റ് ജി ഫിനാൻസ് നിക്ഷേപ തട്ടിപ്പ് കേസിൽ സ്ഥാപന ഉടമകളെ അറസ്‌റ്റ് ചെയ്‌ത് നിയമത്തിന്‍റെ മുന്നിൽ കൊണ്ടുവരാൻ വൈകുന്നതിൽ പ്രതിഷേധിച്ച് ബിജെപിയുടെയും പുല്ലാട് പൗരസമിതിയുടെയും നേതൃത്വത്തിൽ പ്രതിഷേധ സംഗമം നടന്നു. പുല്ലാട് ജങ്ഷനിൽ നടന്ന പ്രതിഷേധം ബിജെപി നേതാവ് പി സി ജോർജ് ഉദ്ഘാടനം ചെയ്‌തു. ജനങ്ങളെ കൊള്ളയടിക്കുന്നതിന് ഭരണാധികാരികളും കൂട്ട് നിൽക്കുന്നതിന്‍റെ ഉദാഹരണമാണ് ജി ആന്‍റ് ജി ഫിനാൻസ് തട്ടിപ്പിൽ കാണുന്നതെന്ന് പി സി ജോർജ് പറഞ്ഞു.
ഇവിടുത്തെ എഡിജിപിയും റിട്ട. എസ്‌പിയും ഈ കൊള്ളയ്ക്ക് കൂട്ട് നിൽക്കുകയാണെന്നും പി സി ജോർജ് ആരോപിച്ചു. ഇവിടെ ജനകീയ വികാരമാണ് ഉയരേണ്ടത്. എൽഡിഎഫും യുഡിഎഫും ഒന്നിച്ചാണ് ജനങ്ങളെ കൊള്ളയടിക്കുന്നത്. ജനങ്ങളെ കൊള്ളയടിക്കുന്നവരെ നിയമത്തിന്‍റെ മുന്നിൽ കൊണ്ടുവരാൻ രാഷ്ട്രീയം മറന്ന് ജനകീയ കൂട്ടായ്‌മ ഉണ്ടാകണമെന്നും പിസി ജോർജ് ആവശ്യപ്പെട്ടു.