കോഴിക്കോട് :പന്തീരാങ്കാവിൽ നവവധുവിനെ വരൻ മർദിച്ച സംഭവത്തിൽ വധശ്രമത്തിനും കേസെടുത്ത് പൊലീസ്. മുഖ്യമന്ത്രിക്കും വനിത കമ്മിഷനും എറണാകുളം ഞാറക്കൽ സ്വദേശിനിയായ വധുവിന്‍റെ വീട്ടുകാർ നൽകിയ പരാതിയുടെ അടിസ്ഥാനത്തിലാണ് വധശ്രമം കൂടി ഉൾപ്പെടുത്തിയത്. നേരത്തെ പെൺകുട്ടിയുടെ മൊഴിയനുസരിച്ച് വരനായ വള്ളിക്കുന്ന് സ്‌നേഹതീരത്തിൽ രാഹുലിന് (26) എതിരെ ഗാർഹിക പീഡനത്തിനായിരുന്നു കേസെടുത്തിരുന്നത്.
ഇതിനെതിരെ നവവധുവും ബന്ധുക്കളും ആക്ഷേപം ഉയർത്തിയിരുന്നു. തുടർന്ന് കേസുമായി ബന്ധപ്പെട്ട് ഇന്നലെ രാത്രി സിറ്റി പൊലീസ് ഡെപ്യൂട്ടി കമ്മിഷണറും അസിസ്റ്റന്‍റ് കമ്മിഷണറും പന്തീരാങ്കാവ് പൊലീസ് ഇൻസ്‌പെക്‌ടറുമായി ചർച്ച നടത്തി. പിന്നാലെ വധുവിനെ ചികിത്സിച്ച ഡോക്‌ടറിൽ നിന്നും വിശദമൊഴി രേഖപ്പെടുത്തി. അതിനുശേഷമാണ് വധശ്രമം കൂടി ഉൾപ്പെടുത്തി കേസ് കൂടുതൽ ബലപ്പെടുത്തിയത്.