കോഴിക്കോട്: കൊടുവള്ളിക്ക് സമീപം എളേറ്റിൽ വട്ടോളിയിൽ വ്യാപാരിയെ തട്ടിക്കൊണ്ടുപോയി ക്രൂരമായി മർദിച്ച കേസിലെ മുഖ്യപ്രതിയെ പൊലീസ് പിടികൂടി. ആവിലോറ പാറക്കൽ മുഹമ്മദ് ആപ്പുവിനെയാണ് (43) കൊടുവള്ളി പൊലീസ് ബെംഗളുരുവിലെ ഒളിത്താവളത്തിൽ നിന്ന് പിടികൂടിയത്. എളേറ്റിൽ വട്ടോളിയിലെ വ്യാപാരിയായ മുഹമ്മദ് ജസീമിനെ ആപ്പുവും കൂട്ടാളികളും തട്ടിക്കൊണ്ടുപോയി മർദിച്ചു എന്നാണ് പരാതി.
2023 ഡിസംബർ 12 ന് ഉച്ചയോടെയാണ് മൂന്നംഗസംഘം മുഹമ്മദ് ജസീമിനെ കടയിൽ നിന്ന് വിളിച്ചിറക്കി കാറിൽ കയറ്റി കൊണ്ടുപോയത്. പിന്നീട് ഇയാളെ മണ്ണിൽ കടവിലെ ആളൊഴിഞ്ഞ വീട്ടിലെത്തിച്ച് ക്രൂരമായി മർദിച്ച് റോഡരികിൽ ഉപേക്ഷിക്കുകയായിരുന്നു. ഈ കേസിൽ നേരത്തെ കിഴക്കോത്ത് ആവിലോറ പാറക്കൽ അബ്‌ദുൽ റസാഖ് സക്കറിയ, റിയാസ്, മതുകൂട്ടികയിൽ നാസി എന്ന അബ്‌ദുൽ നാസർ എന്നിവർ അറസ്റ്റിൽ ആയിരുന്നു.