പത്തനംതിട്ട: സിംഗപ്പൂരിൽ ജോലി തരപ്പെടുത്തിക്കൊടുക്കാമെന്ന് പറഞ്ഞ്‌ ലക്ഷങ്ങൾ തട്ടിയ പ്രതിയെ കോയിപ്രം പൊലീസ് പിടികൂടി. ഇടുക്കി കുമളി റോസാപ്പൂക്കണ്ടം ഹാറൂൺ മൻസിലിൽ ഫിറോസ് ഖാൻ (44) ആണ് അറസ്‌റ്റിലായത്. പി ജെ ആന്‍റണി സജുവിന്‍റെ പരാതിയിൽ രജിസ്‌റ്റർ ചെയ്‌ത കേസിലാണ് അറസ്‌റ്റ്.
കഴിഞ്ഞവർഷം ആഗസ്‌റ്റ് 28 മുതൽ ഒക്‌ടോബർ 20 വരെയുള്ള കാലയളവിൽ പലതവണയായായാണ് പ്രതി തട്ടിപ്പ് നടത്തിയത്. ആന്‍റണി സജുവിന് സിംഗപ്പൂരിൽ ജോലി തരപ്പെടുത്തികൊടുക്കാമെന്ന് വാഗ്‌ദാനം ചെയ്ത് പലതവണയായി ബാങ്ക് അക്കൗണ്ട് വഴി ലക്ഷങ്ങൾ തട്ടിയെടുക്കുകയായിരുന്നു.
പുറമറ്റം ഫെഡറൽ ബാങ്ക് ശാഖയിൽ ഇദ്ദേഹത്തിന്‍റെ ഭാര്യയുടെ പേരിലുള്ള അക്കൗണ്ടിൽ നിന്നും പ്രതിയുടെ യൂണിയൻ ബാങ്ക് ഓഫ് ഇന്ത്യയിലെ അക്കൗണ്ടിലേക്ക് 2023 ആഗസ്‌റ്റ് 28 ന് 80000 രൂപ കൈമാറി. അന്നുതന്നെ ഗൂഗിൾ പേ വഴി 50000 രൂപയും കൈക്കലാക്കി. പിന്നീട് പല തീയതികളിലായി ആകെ 4,90,000 രൂപയും ബാങ്ക് അക്കൗണ്ട് വഴി കൈവശപ്പെടുത്തി.