'ഭൂമിയെ ചുംബിച്ച് പഴമയുടെ ചൂടുഗോപുരം', നിലം പൊത്തിയത് നൂറ്റാണ്ടിന്‍റെ പഴക്കമുള്ള ദി കാലിക്കറ്റ് ടൈൽ കമ്പനി

കേരളത്തിലെ ആദ്യ ഓട്ടുകമ്പനിയും ഇന്ത്യയിലെ ആദ്യ മെഷീൻ ഓട്ടുകമ്പനിയുമാണ് ഓർമയായത്.

കോഴിക്കോട്: കോഴിക്കോട് ജില്ലയിലെ ഓട് വ്യവസായത്തിന്‍റെ സ്‌തംഭമായിരുന്ന ചിമ്മിനി (പുകക്കുഴൽ) തലതാഴ്ത്തി. 145 വർഷത്തിലേറെ പഴക്കമുള്ള ഫറോക്കിലെ ദി കാലിക്കറ്റ് ടൈൽ കമ്പനി ചരിത്രമായതോടെയാണ് ചിമ്മിനിയും തകർത്തത്. നിരവധി തൊഴിലാളികളുടെ മാസങ്ങളുടെ നിർമാണ വൈഭവമാണ് നിലംപരിശായത്.

നൂറുകണകണക്കിന് ഇഷ്‌ടികകൾ അടുക്കി വെച്ചുളള ഈ പുകക്കുഴൽ റോഡ് -റെയിൽ യാത്രക്കാരുടെ അതിശയ കാഴ്‌ച വസ്‌തു കൂടിയായിരുന്നു. കേരളത്തിൽ മാത്രമല്ല, ഇന്ത്യക്കകത്തും പുറത്തും മേൽക്കൂരകളിൽ വിപ്ലവം തീർത്ത ഓട്ടുകമ്പനിയായിരുന്നു ദി കാലിക്കറ്റ് ടൈൽ കമ്പനി. അസംസ്‌കൃത വസ്‌തുക്കളുടെ ലഭ്യതക്കുറവും ബിസിനസ്‌ തളർച്ചയുമാണ് കമ്പനിക്ക് താഴിട്ടത്.

കേരളത്തിലെ ആദ്യ ഓട്ടുകമ്പനിയും ഇന്ത്യയിലെ ആദ്യ മെഷീൻ ഓട്ടുകമ്പനിയുമാണ് ഇതോടെ ഓർമയായത്. ബ്രിട്ടീഷ് ഭരണകാലത്താണ് കാലിക്കറ്റ് ടൈൽ കമ്പനി കോഴിക്കോട് ജില്ലയിലെ ഫറോക്കിൽ സ്ഥാപിതമായത്. 1878-ൽ ഫറോക്ക് ചാലിയാറിന്‍റെ തീരത്ത് നടരാജ മുതലിയാരാണ് കമ്പനി സ്ഥാപിച്ചത്. പിന്നീട് മൂന്ന് മാനേജ്‌മെന്‍റുകൾ മാറി മാറി കമ്പനി നടത്തി.

എട്ട് വർഷത്തോളമായി നിർമ്മാണം നിലച്ചിട്ട്. ഒടുവിൽ ടൂറിസം സാധ്യത മനസിലാക്കിയാണ് പഴമയുടെ 'ചൂടുഗോപുര'ത്തേയും പിഴുതെറിഞ്ഞത്. മൂന്നര ലക്ഷത്തോളം ഇഷ്‌ട്ടികകളാല്‍ നിര്‍മ്മിതമായ ചിമ്മിനിയ്‌ക്ക്‌ ഏകദേശം 145 അടിയോളമാണ്‌ നീളം.