എറണാകുളം: ഒട്ടോ ഡ്രൈവർമാരുടെ അശ്രദ്ധയിൽ ആലുവയിൽ യുവാവിന് ദാരുണാന്ത്യം. ഒരു ഒട്ടോ മറ്റൊരു ഒട്ടോറിക്ഷയെ കയർ ഉപയോഗിച്ച് റോഡിലൂടെ കെട്ടിവലിച്ച് കൊണ്ടുപോകുന്നതിനിടെയാണ് ബൈക്ക് യാത്രക്കാരൻ കയറിൽ കുരുങ്ങി നിലത്ത് വീണത്. ഗുരുതരമായി പരിക്കേറ്റ ഇരുചക്ര വാഹന യാത്രക്കാരനായ ആലുവ മാറമ്പിള്ളി സ്വദേശി ഫഹദിനെ ആശുപത്രിയിലെത്തിച്ചെങ്കിലും മരണം സംഭവിക്കുകയായിരുന്നു.
കയറിൽ കഴുത്ത് കുരുങ്ങിയ ഫഹദിൻ്റെ ഹെൽമെറ്റ് തെറിച്ചു പോവുകയും റോഡിൽ തലയടിച്ച് വീഴുകയുമായിരുന്നു. റോഡിൻ്റെ ഒരു വശത്തു നിന്നും കേടായ മറ്റൊരു ഒട്ടോയെ കയർ കെട്ടിയ നിലയിൽ പ്രധാന റോഡിലേക്ക് പ്രവേശിക്കുകയായിരുന്നു. ഈ സമയം രണ്ട് ഒട്ടോകളെ ബന്ധിപ്പിച്ച നിലയിൽ പ്രധാന റോഡിനെ ക്രോസ് ചെയ്‌തായിരുന്നു കയർ ഉണ്ടായിരുന്നത്. ഇതിനിടെ വേഗതയിൽ ബൈക്കിൽ എത്തിയ ഫഹദ് കയർ ശ്രദ്ധയിൽപ്പെടാതെ മുന്നോട്ട് എടുക്കുകയും അപകടത്തിൽപ്പെടുകയുമായിരുന്നു.