പത്തനംതിട്ട:കടം ചോദിച്ചത് കൊടുക്കാത്തതിന് സുഹൃത്തിനെയും അയിരൂർ കൈതക്കോടി സ്വദേശിയെയും കത്തികൊണ്ട് കുത്തിക്കൊലപ്പെടുത്താൻ ശ്രമിച്ച കേസിലെ പ്രതിയെ കോയിപ്രം പൊലീസ് അറസ്‌റ്റ് ചെയ്‌തു. അയിരൂർ കൈതക്കോടി പുതിയകാവ് പാറക്കാലായിൽ ആറന്മുള ഐക്കര സരോവരം വീട്ടിൽ വാടകയ്ക്ക് താമസിക്കുന്ന ശിവകുമാർ (49), സുഹൃത്ത് ഷിബു എന്നിവർക്കാണ് കുത്തേറ്റത്. പ്രതി മലയാലപ്പുഴ താഴം വീട്ടിൽ രഞ്ജിത്ത് (37) ആണ് പിടിയിലായത്.
ശിവകുമാറിൻ്റെ പണിക്കാർ വാടകയ്ക്ക് താമസിക്കുന്ന വീടിൻ്റെ സിറ്റൗട്ടിൽ വച്ചാണ് ആക്രമണമുണ്ടായത്. രഞ്ജിത്തിനെ പണിക്കായി ശിവകുമാർ വിളിക്കാത്തതും ആക്രമണത്തിന് കാരണമായി. കൊല്ലുമെന്ന് ഭീഷണിപ്പെടുത്തി പാഞ്ഞടുത്ത രഞ്ജിത്ത്, സിറ്റൗട്ടിൽ ഇരുന്ന ശിവകുമാറിൻ്റെ പിൻഭാഗത്ത് കത്തികൊണ്ട് രണ്ടുപ്രാവശ്യം ആഞ്ഞുകുത്തുകയായിരുന്നു. ഇയാൾക്ക് ആഴത്തിൽ മുറിവേറ്റു. ആക്രമണം തടയാൻ ഓടിയെത്തിയ വീടിൻ്റെ ഉടമസ്ഥനെ രഞ്ജിത്ത് ആക്രമിക്കാൻ ശ്രമിച്ചു. പിന്നീട് മുറ്റത്തു നിന്ന ഷിബുവിൻ്റെ വയറിൻ്റെ ഇരുവശത്തും കുത്തി മുറിവേൽപ്പിച്ചു. ഓടിയെത്തിയ അയൽവാസി നീലകണ്‌ഠനെയും കുത്തി പരിക്കേൽപ്പിച്ചു.
അടിയന്തിര ശസ്‌ത്രക്രിയക്ക് ശേഷം ഷിബു ഐസിയുവിലായതിനാൽ ശിവകുമാറിൻ്റെ മൊഴിയെടുത്താണ് കേസ് രജിസ്‌റ്റർ ചെയ്‌തത്. സംഭവസ്ഥലത്ത് അന്വേഷണ സംഘവും വിരലടയാള വിദഗ്‌ധരും എത്തി തെളിവുകൾ ശേഖരിച്ചു. കൃത്യത്തിനുശേഷം പ്രതി ബൈക്കിൽ രക്ഷപ്പെട്ടു. ജില്ലാ പൊലീസ് മേധാവിയുടെ നിർദ്ദേശപ്രകാരം ഇയാളുടെ മൊബൈൽ ഫോണിൻ്റെ ലൊക്കേഷൻ സൈബർ സെല്ലിൻ്റെ സഹായത്തോടെ കണ്ടെത്തിയതിനെത്തുടർന്ന് ഇന്നലെ വൈകിട്ടോടെ മലയാലപ്പുഴയിൽ നിന്നും പിടികൂടി.