രാജീവ്‌ ചന്ദ്രശേഖറിന് വേണ്ടി പ്രചാരണത്തിനിറങ്ങാൻ ശോഭന, രാഷ്‌ട്രീയത്തിലേക്കോ എന്ന ചോദ്യത്തിന് മലയാളം പഠിക്കട്ടെയെന്ന് മറുപടി - Shobhana campaign for NDA candidate

ശോഭന, രാജീവ്‌ ചന്ദ്രശേഖറിനോടൊപ്പം നെയ്യാറ്റിൻകരയിൽ റോഡ് ഷോയിൽ പങ്കെടുക്കും

തിരുവനന്തപുരം :പ്രശസ്‌ത നടിയും നർത്തകിയുമായ ശോഭന തിരുവനന്തപുരം ലോക്‌സഭ മണ്ഡലത്തിലെ എൻഡിഎ സ്ഥാനാർഥി രാജീവ്‌ ചന്ദ്രശേഖറിന് വേണ്ടി പ്രചാരണത്തിനിറങ്ങും. തിരുവനന്തപുരത്ത് ബിജെപി ജില്ല ഭാരവാഹികളോടൊപ്പം നടത്തിയ വാര്‍ത്ത സമ്മേളനത്തിൽ ശോഭന തന്നെയാണ് സ്ഥാനാർഥിക്ക് വേണ്ടി പ്രചാരണത്തിനിറങ്ങുമെന്ന് വ്യക്തമാക്കിയത്. നെയ്യാറ്റിൻകരയിൽ രാജീവ്‌ ചന്ദ്രശേഖറിനോടൊപ്പം ശോഭന റോഡ് ഷോയിൽ പങ്കെടുക്കും.

സജീവ രാഷ്‌ട്രീയ പ്രവർത്തനത്തിലേക്ക് ഉണ്ടോ എന്ന് ചോദ്യത്തിന് ആദ്യം മലയാളം പഠിക്കട്ടെ എന്നായിരുന്നു ശോഭനയുടെ മറുപടി. പറയാനും പ്രസംഗിക്കാനുമൊക്കെ കഴിയട്ടെയെന്നും ഇപ്പോൾ നടി മാത്രമെന്നും ശോഭന പറഞ്ഞു. നടി ശോഭനയ്‌ക്ക് സ്ഥാനാർഥി രാജീവ്‌ ചന്ദ്രശേഖർ വിഷുകൈനീട്ടവും നൽകി.

അതേസമയം നാളെ പ്രധാനമന്ത്രി നരേന്ദ്ര മോദിയുടെ പരിപാടിയിൽ പങ്കെടുക്കുമെന്നും ശോഭന വ്യക്തമാക്കി. നാളെ രാവിലെ 11 മണിയോടെ കാട്ടാക്കടയിലാണ് പ്രധാനമന്ത്രി നരേന്ദ്ര മോദിയുടെ പൊതുപരിപാടി. ഇന്ന് നെയ്യാറ്റിൻകരയിൽ രാജീവ്‌ ചന്ദ്രശേഖറിന്‍റെ പ്രചാരണ പരിപാടിയിൽ ശോഭന പങ്കെടുക്കും.

ശോഭന എല്ലാവർക്കും പ്രചോദനം നൽകുന്ന താരമാണെന്നും രാജ്യത്ത് പുരോഗതിയും മാറ്റവും വേണമെന്ന് എല്ലാവരും ആഗ്രഹിക്കുന്നുവെന്നും എൻഡിഎ സ്ഥാനാർഥി രാജീവ്‌ ചന്ദ്രശേഖർ വാർത്ത സമ്മേളനത്തിൽ പറഞ്ഞു. ശോഭന നൽകുന്ന പിന്തുണയിൽ സന്തോഷമുണ്ടെന്നും രാജീവ്‌ ചന്ദ്രശേഖർ കൂട്ടിച്ചേർത്തു.