രോഹന്‍ ബൊപ്പണ്ണ ലോക ടെന്നീസിലെ പ്രായമേറിയ ഒന്നാം നമ്പര്‍ താരമാകും. പുരുഷന്മാരുടെ ഡബിള്‍സ് വിഭാഗത്തിലാണ് രോഹണ്‍ ബൊപ്പണ്ണക്ക് ലോക ഒന്നാം നമ്പര്‍ പദവി ലഭിച്ചത് (Rohan Boppanna To Become World No 1 In Men's Doubles). ഡബിള്‍സ് പങ്കാളി മാത്യു എഡ്ബണിനൊപ്പം ചേര്‍ന്ന് ഓസ്ട്രേല്യന്‍ ഓപ്പണ്‍ സെമിയിലെത്തിയതോടെയാണ് രോഹന്‍ ബൊപ്പണ്ണ ഒന്നാം നമ്പര്‍ പദവി സ്വന്തമാക്കുന്ന പ്രായമേറിയ താരമെന്ന ബഹുമതി ബൊപ്പണ്ണയ്ക്ക് ലഭിച്ചത്.
നേരത്തേ ലോക മൂന്നാം നമ്പര്‍ സ്ഥാനത്തായിരുന്ന 43 കാരനായ രോഹന്‍ ബൊപ്പണ്ണ, ഓസ്ട്രേല്യന്‍ ഓപ്പണിലെ കുതിപ്പോടെയാണ് ഒന്നാം റാങ്കിലേക്കുയര്‍ന്നത്. ഓസ്ട്രേലിയൻ പങ്കാളിക്കൊപ്പം ചേര്‍ന്ന് ആറാം സീഡായ അര്‍ജന്‍റൈന്‍ ജോഡിക്കെതിരെ അനായാസ വിജയം പിടിച്ചെടുക്കുകയായിരുന്നു ബൊപ്പണ്ണ. സീഡ് ചെയ്യപ്പെടാത്ത തോമസ്മച്ചാക്, സീഷെന്‍സാങ്ങ് സഖ്യത്തേയാണ് ഇവര്‍ സെമിയില്‍ നേരിടുക.
തിങ്കാളാഴ്‌ച ടൂര്‍ണമെന്‍റ് അവസാനിക്കുമ്പോള്‍ ലോക ഒന്നാം നമ്പര്‍ സ്ഥാനം രോഹന്‍ ബൊപ്പണ്ണയ്ക്ക് സ്വന്തമാകും. 2013 ല്‍ നേടിയ ലോക മൂന്നാം നമ്പര്‍ റാങ്കിങ്ങാണ് രോഹന്‍ ബൊപ്പണ്ണയുടെ ഇതേവരെയുള്ള ഉയര്‍ന്ന നേട്ടം. ടെന്നീസ് ഡബിള്‍സില്‍ ലോക ഒന്നാം നമ്പര്‍ പദവിയിലെത്തുന്ന നാലാമത്തെ ഇന്ത്യന്‍ താരമാണ് രോഹന്‍ ബൊപ്പണ്ണ. നേരത്തേ ലിയാണ്ടര്‍ പേസ്, മഹേഷ് ഭൂപതി, സാനിയ മിര്‍സ എന്നിവരും ഇതേ നേട്ടം കൈവരിച്ചിട്ടുണ്ട്.