ഗുവാഹത്തി: അസമിന്‍റെ വന്യജീവി സംരക്ഷണ ശ്രമങ്ങൾക്ക് പുതിയൊരു പൊന്‍തൂവല്‍. സിഖ്‌ന ജ്വാലാവോ ദേശീയോദ്യാനത്തെ ബിടിആറിലെ (Bodoland Territorial Region) മൂന്നാമത്തെയും അസമിലെ എട്ടാമത്തെയും ദേശീയോദ്യാനമായി പ്രഖ്യാപിച്ചു. ഭൂട്ടാന്‍റെ താഴ്‌വരയിൽ ചിരാങ്, കൊക്രഝർ ജില്ലകളിലായി 316.29 ചതുരശ്ര കിലോമീറ്റർ വിസ്‌തൃതിയിൽ വ്യാപിച്ചുകിടക്കുന്നതാണ് ഈ പാർക്ക്. ചിരാങ്, മാനസ് റിസർവ് വനങ്ങളിലായാണ് ഇത് സ്ഥിതി ചെയ്യുന്നത്. ജൈവ വൈവിധ്യത്താൽ സമ്പന്നമാണ് സിഖ്‌ന ജ്വാലാവോ ദേശീയോദ്യാനം.
ലോകത്തിൽ ഏറ്റവും കൂടുതൽ വംശനാശഭീഷണി നേരിടുന്ന കുരങ്ങുകളായ ഗീസ് ഗോൾഡൻ ലാൻഗുറുകൾ, ആനകൾ, കാണ്ടാമൃഗങ്ങൾ, കടുവകൾ, പുള്ളിപ്പുലികൾ എന്നിവയുൾപ്പെടെ നിരവധി ജീവിവർഗങ്ങളുടെ ആവാസ കേന്ദ്രമാണിത്. ഈ ദേശീയോദ്യാനത്തിന്‍റെ ദേശീയ പദവി ബോഡോലാൻഡ് ടെറിട്ടോറിയൽ മേഖലയിലെ (ബിടിആർ) വന്യജീവി സംരക്ഷണത്തെ ശക്തിപ്പെടുത്തുക മാത്രമല്ല, റൈമാന, മാനസ് ദേശീയോദ്യാനങ്ങൾക്കിടയിലുള്ള ഒരു പ്രധാന ഇടനാഴിയായും പ്രവർത്തിക്കുന്നു.
ഇന്തോ-ഭൂട്ടാൻ അതിർത്തിയിലെ ഒരു പ്രകൃതിദത്ത സങ്കേതം: ഇന്തോ-ഭൂട്ടാൻ അതിർത്തിയിലാണ് സിഖ്‌ന ജ്വാലാവോ ദേശീയോദ്യാനം സ്ഥിതി ചെയ്യുന്നത്, അതിന്‍റെ വടക്കൻ അതിർത്തി സർലപാര മാർക്കറ്റും തെക്കൻ അതിർത്തി പൂർണാഗുരി, കാശിഗുരി എഫ്‌വി, ഖൽഷി, കെണ്ടുഗുരി തുടങ്ങിയ ഗ്രാമങ്ങളും ചേർന്നതാണ്. ഭൂട്ടാന്‍റെ സർപാങ് ജില്ലയുമായി ഈ പാർക്ക് ഒരു അന്താരാഷ്‌ട്ര അതിർത്തി പങ്കിടുന്നു, ഇന്ത്യയെ അയൽ രാജ്യവുമായി ബന്ധിപ്പിക്കുന്ന സരൽപാറയിൽ ഒരു പ്രവേശന പോയിന്‍റുമുണ്ട്.
അസമിലെ ബോഡോലാൻഡ് ടെറിട്ടോറിയൽ മേഖലയിലെ (ബിടിആർ) റൈമാന ദേശീയോദ്യാനത്തിന്‍റെ കിഴക്ക് ഭാഗത്തായി സരൾഭംഗ നദിയും (പ്രാദേശികമായി സ്വരമാംഗ എന്നറിയപ്പെടുന്നു) പടിഞ്ഞാറുഭാഗത്ത് ധൽപാനി നദിയും സ്ഥിതി ചെയ്യുന്നു. ദേവശ്രീ എഫ്‌വി, ശാന്തിപൂർ എഫ്‌വി, ഭൂർ എഫ്‌വി തുടങ്ങിയ ഗ്രാമങ്ങളാണ് ദേശീയോദ്യാനത്തിന്‍റെ കിഴക്കേ അറ്റത്തുള്ളത്. ലാവോട്ടി മിനി ജലവൈദ്യുത പദ്ധതിയും ദേശീയോദ്യാനത്തിലാണുള്ളത്.
We recently approved Assam's 8th National Park, Sikhna Jwhwlao National Park.
— Himanta Biswa Sarma (@himantabiswa) February 19, 2025
This Park, spread over 316 Sq. Km is part of the Greater Manas Conservation Landscape and connects 4 other parks in the region.
With this, Assam now has the 2nd highest National Parks in the country. pic.twitter.com/5uUWsDwzqI
സ്വർണ ലാൻഗുറുകളുടെ ഒരു വാസസ്ഥലം: ഇന്ത്യയിലെയും ഭൂട്ടാനിലെയും ചില വനപ്രദേശങ്ങളിൽ മാത്രം കാണപ്പെടുന്ന ഗീസ് ഗോൾഡൺ ലാൻഗുറുകൾ ഏറ്റവും കൂടുതലായി കാണപ്പെടുന്ന ദേശീയോദ്യാനമാണിത്. പ്രൈമേറ്റ് റിസർച്ച് സെന്‍റർ എൻ‌ഇ ഇന്ത്യ (പി‌ആർ‌സി‌എൻ‌ഇ), വനം വകുപ്പ്, ബോ ഡോലാൻഡ് ടെറിട്ടോറിയൽ കൗൺസിൽ, സാക്കോൺ, കൺസർവേഷൻ ഹിമാലയങ്ങൾ എന്നിവ അടുത്തിടെ നടത്തിയ ഒരു സർവേയിൽ 2000ത്തിലധികം സ്വർണ ലാൻഗുറുകൾ പാർക്കിൽ വസിക്കുന്നതായി കണ്ടെത്തി.
'വന നശീകരണവും മനുഷ്യരുടെ കൈയേറ്റവും മൂലം ആവാസവ്യവസ്ഥ ചുരുങ്ങിക്കൊണ്ടിരിക്കുന്ന സ്വർണ ലാൻഗുറുകളുടെ സംരക്ഷണത്തിന് ഈ പാർക്ക് നിർണായകമാകുമെന്ന്' പാർക്കിന്‍റെ പുതിയ പദവിയെക്കുറിച്ച് സംസാരിച്ച വൈൽഡ്‌ ലൈഫ് ട്രസ്‌റ്റ് ഓഫ് ഇന്ത്യയുടെ ജോയിന്‍റ് ഡയറക്‌ടർ രതിൻ ബർമൻ പറഞ്ഞു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
സിഖ്‌ന ജ്വാലാവോ ദേശീയോദ്യാനത്തിന്‍റെ പേരിന്‍റെ ഉത്ഭവം: ബോഡോ സമൂഹം ആദരിക്കുന്ന നേതാവായ സിഖ്‌ന ജ്വാലാവോയിൽ നിന്നാണ് പാർക്കിന് ഈ പേര് ലഭിച്ചത്. 'ലച്ചിത് ബോർഫുകാൻ അസമിന് എങ്ങനെയാണോ, അതുപോലെയാണ് ബോഡോകൾക്ക് സിഖ്‌ന ജ്വാലാവോ. 1866-68 കാലഘട്ടത്തിൽ ഭൂട്ടാനും ബ്രിട്ടീഷ് സൈന്യവും തമ്മിൽ യുദ്ധം ചെയ്‌ത ഒരു ബോഡോ വീരനായിരുന്നു സിഖ്‌ന.
അദ്ദേഹത്തിന്‍റെ സ്ഥലമായ സിഖനാഝർ, ഇന്ത്യ-ഭൂട്ടാൻ അതിർത്തിയിലുള്ള സർഭംഗയ്ക്കടുത്തുള്ള അൽതപാനി റിസർവ് വനത്തിലായിരുന്നു സ്ഥിതി ചെയ്യുന്നത്. സിഖ്‌ന ജ്വലാവോ ദേശീയോദ്യാനത്തിനുള്ളിലാണ് ഇപ്പോൾ ആ സ്ഥലമുള്ളത്. ബോഡോകൾ പരമ്പരാഗതമായി എല്ലാ വർഷവും അവിടെ 'ബത്തൗ ഖെറായി' പൂജ നടത്താറുണ്ട്. ദേവന്മാരുടെ പുണ്യസ്ഥലമായാണ് ഈ പ്രദേശം കണക്കാക്കപ്പെടുന്നത്' എന്ന് രതിൻ ബർമൻ പറഞ്ഞു.
വന്യജീവി സംരക്ഷണ ശ്രമങ്ങൾക്ക് നാഷണൽ ടാഗ് എങ്ങനെ സഹായകമാകും: സിഖ്‌ന ജ്വാലാവോയെ ദേശീയോദ്യാനമായി അംഗീകരിക്കുന്നത് മനുഷ്യ-വന്യജീവി സംഘർഷം ലഘൂകരിക്കാനും റൈമാന, മാനസ് ദേശീയോദ്യാനങ്ങൾക്കിടയിൽ സഞ്ചരിക്കുന്ന മൃഗങ്ങൾക്ക് സുരക്ഷിതമായ പാത നൽകാനും സഹായിക്കുമെന്ന് രതിൻ ബർമൻ അറിയിച്ചു. പാരിസ്ഥിതിക സംരക്ഷണത്തിനും പ്രാദേശിക വികസനത്തിനും ഇടയിലുള്ള സന്തുലിതാവസ്ഥ ഉറപ്പാക്കിക്കൊണ്ട് കൂടുതൽ ഘടനാപരമായ സംരക്ഷണ തന്ത്രത്തിന് ഈ നീക്കം സംഭാവന നൽകുമെന്ന് അദ്ദേഹം കൂട്ടിച്ചേർത്തു.
അസമിലെ എട്ട് ദേശീയോദ്യാനങ്ങൾ:
- കാസിരംഗ ദേശീയോദ്യാനം- 1090 ചതുരശ്ര കിലോമീറ്റർ (1974)
- മാനസ് ദേശീയോദ്യാനം- 500 ചതുരശ്ര കിലോമീറ്റർ (1990)
- നമേരി ദേശീയോദ്യാനവും വനസംരക്ഷണ കേന്ദ്രവും - 200 ചതുരശ്ര കിലോമീറ്റർ (1998)
- ദിബ്രു സൈഖോവ ദേശീയോദ്യാനം, 350 ചതുരശ്ര കിലോമീറ്റർ (1999)
- ഒറാങ് ദേശീയോദ്യാനം 79.28 ചതുരശ്ര കിലോമീറ്റർ (1999)
- ഡെഹിങ് പട്‌കായ് ദേശീയോദ്യാനം 231.65 ചതുരശ്ര കിലോമീറ്റർ, (2020)
- റൈമോണ ദേശീയോദ്യാനം, 422 ചതുരശ്ര കിലോമീറ്റർ (2021)
- സിഖ്‌ന ജ്വാലാവോ ദേശീയോദ്യാനം, 316.29 ചതുരശ്ര കിലോമീറ്റർ, (2025)
Also Read: വരയാടുകളുടെ പ്രജനന കാലം; ഇരവികുളത്ത് സന്ദര്‍ശകരെ വിലക്കും; നിയന്ത്രണം മാര്‍ച്ച് 31 വരെ
