പാരിസ് : പാരിസ് ഒളിമ്പിക്‌സിന് സ്വാദ് പകരാൻ ആന്ധ്രയുടെ സ്വന്തം അറകു കോഫിയും. ആന്ധ്രാപ്രദേശിലെ അറകു കോഫിക്ക് അന്താരാഷ്ട്ര അംഗീകാരമുണ്ട്. ഒളിമ്പിക്‌സിനായി പാരിസിലെത്തുന്ന കായിക താരങ്ങളെയും അതിഥികളെയും ഇനി ഫ്രഷ് അറകു കോഫി ചൂടോടെ വരവേൽക്കും. ഇതോടെ അറകു താഴ്‌വരയിലെ കാപ്പി കൃഷിയിൽ നിന്നും നിർമിക്കുന്ന അറകു കോഫിയുടെ പ്രശസ്‌തി ലോകം മുഴുവൻ അറിയും.
ആന്ധ്രാപ്രദേശിലെ അല്ലൂരി സീതാരാമരാജു ജില്ല പ്രശസ്‌തമായത് അറകു കോഫിയുടെ പേരിലാണ്. ഇവിടെയാണ് അറകു കാപ്പി വൻതോതിൽ കൃഷി ചെയ്യുന്നത്. നല്ല സുഗന്ധവും രുചിയുമുള്ള അറകു കോഫി ഇതിനോടകം നിരവധി അന്താരാഷ്ട്ര പുരസ്‌കാരങ്ങളും നേടിയിട്ടുണ്ട്. 1.5 ലക്ഷത്തോളം വരുന്ന ആദിവാസി കുടുംബങ്ങളാണ് അറകു കാപ്പി കൃഷി ചെയ്യുന്നത്. ഈ കാപ്പി കൃഷിയെ പ്രോത്സാഹിപ്പിക്കുന്നത് ആന്ധ്രാപ്രദേശ് മുഖ്യമന്ത്രി ചന്ദ്രബാബു നായിഡുവാണ്.