ലഖ്‌നൗ: ഇറാനി കപ്പില്‍ മുംബൈയ്‌ക്കെതിരായ മത്സരത്തിലെ ആദ്യ ഇന്നിങ്സിലെ മോശം പ്രകടനത്തിന് പിന്നാലെ റെസ്റ്റ് ഓഫ് ഇന്ത്യയുടെ നായനും സ്റ്റാര്‍ ബാറ്ററുമായ റിതുരാജ് ഗെയ്‌ക്‌വാദിനെതിരെ ആരാധകര്‍ രംഗത്ത്. ലഖ്‌നൗ ഏകന സ്പോര്‍ട്‌സ് സിറ്റി സ്റ്റേഡിയത്തില്‍ പുരോഗമിക്കുന്ന മത്സരത്തിന്‍റെ ആദ്യ ഇന്നിങ്‌സില്‍ 27 പന്ത് നേരിട്ട റിതുരാജ് 9 റണ്‍സ് മാത്രം നേടിയാണ് മടങ്ങിയത്. ബോര്‍ഡര്‍ ഗവാസ്‌കര്‍ ട്രോഫി ഉള്‍പ്പടെ വരാനിരിക്കുന്ന സാഹചര്യത്തിലാണ് താരത്തിന്‍റെ മോശം പ്രകടനത്തില്‍ ആരാധകരും നിരാശ പ്രകടിപ്പിച്ചിരിക്കുന്നത്.
നവംബര്‍ ഡിസംബര്‍ മാസങ്ങളിലായാണ് ബോര്‍ഡര്‍ ഗവാസ്‌കര്‍ ട്രോഫിക്കായി ഇന്ത്യൻ സംഘം ഓസ്‌ട്രേലിയയിലേക്ക് പറക്കുക. അഞ്ച് മത്സരങ്ങളാണ് ടെസ്റ്റ് പരമ്പരയില്‍. പരമ്പരയ്‌ക്കുള്ള ഇന്ത്യൻ ടീമില്‍ സ്ഥാനം കണ്ടെത്തണമെങ്കില്‍ റിതുരാജ് ഗെയ്‌ക്‌വാദിന് ഇറാനി കപ്പിലും തുടര്‍ന്ന് എത്തുന്ന രഞ്ജി ട്രോഫി ക്രിക്കറ്റിലും മികവ് കാട്ടേണ്ടതുണ്ട്.