ബെര്‍ലിൻ: യൂറോ കപ്പ് 2024 ഫുട്‌ബോളിലെ ഏറ്റവും മികച്ച താരമായി സ്പെയിന്‍റെ മധ്യനിര താരം റോഡ്രി. കലാശപ്പോരാട്ടത്തില്‍ ഇംഗ്ലണ്ടിനെ തകര്‍ത്ത് സ്പെയിൻ യൂറോപ്പിന്‍റെ നെറുകയില്‍ എത്തിയതിന് പിന്നാലെയാണ് റോഡ്രിയെ ടൂര്‍ണമെന്‍റിലെ മികച്ച താരമായി തെരഞ്ഞെടുത്തത്. ടൂര്‍ണമെന്‍റില്‍ അപരാജിത കുതിപ്പ് നടത്തി കിരീടത്തില്‍ മുത്തമിട്ട സ്പെയിന് വേണ്ടി തകര്‍പ്പൻ പ്രകടനങ്ങളായിരുന്നു റോഡ്രി മധ്യനിരയില്‍ കാഴ്‌ചവെച്ചത്.
കരുത്തരായ ജര്‍മനി, ഫ്രാൻസ് ടീമുകള്‍ക്കെതിരായ മത്സരങ്ങളില്‍ മികച്ച പ്രകടനമായിരുന്നു റോഡ്രി സ്പെയിനായി നടത്തിയത്. ടൂര്‍ണമെന്‍റില്‍ ഉടനീളം 521 മിനിറ്റാണ് താരം മൈതാനത്ത് ചെലവഴിച്ചത്. ഈ സമയത്തിനിടെ 439 പാസ് ശ്രമങ്ങള്‍ നടത്തിയ താരം വിജയകരമായി 411 പാസുകളാണ് പൂര്‍ത്തിയാക്കിയത്. 92.84 ശതമാനമായിരുന്നു ടൂര്‍ണമെന്‍റില്‍ താരത്തിന്‍റെ പാസിങ് കൃത്യത.