ന്യൂഡൽഹി: ഇംഗ്ലണ്ടും ശ്രീലങ്കയും തമ്മിൽ മൂന്ന് മത്സരങ്ങളടങ്ങിയ ടെസ്റ്റ് പരമ്പരയിലെ ആദ്യ മത്സരത്തിൽ നാലാം ദിനം ഇംഗ്ലണ്ട് അഞ്ച് വിക്കറ്റിന് ശ്രീലങ്കയെ പരാജയപ്പെടുത്തി. ഇംഗ്ലണ്ടിനായി സെഞ്ച്വറി നേടിയ ജാമി സ്‌മിത്ത് പ്ലെയർ ഓഫ് ദി മാച്ച് ആയി തിരഞ്ഞെടുക്കപ്പെട്ടു. 205 റൺസ് വിജയലക്ഷ്യം പിന്തുടർന്ന ഇംഗ്ലണ്ടിന് മോശം തുടക്കത്തിന് ശേഷം ജോ റൂട്ട് 108 പന്തിൽ അർധ സെഞ്ച്വറി തികക്കുകയും ടീമിനെ വിജയത്തിലെത്തിക്കുകയും ചെയ്‌തു.
ജോ റൂട്ടും ജാമി സ്‌മിത്തും ചേർന്ന് നേടിയ 64 റൺസിന്‍റെ കൂട്ടുകെട്ടിന്‍റെ പിൻബലത്തിൽ ഓൾഡ് ട്രാഫോർഡിൽ നടന്ന മത്സരത്തിൽ ഇംഗ്ലണ്ടിന് വിജയം നേടാനായി.11 റൺസിന് ഓപ്പണർ ബെൻ ഡക്കറ്റിനെയാണ് ആതിഥേയ ടീമിന് ആദ്യം നഷ്‌ടമായത്. പിന്നാലെ ക്യാപ്റ്റൻ ഒല്ലി പോപ്പും പുറത്തായി. പിന്നീട് മിലൻ രത്‌നായകെ 34 റൺസിന് ഡാൻ ലോറൻസിനെ എൽബിഡബ്ല്യു പുറത്താക്കി. റൂട്ടിനൊപ്പം 49 റൺസിന്‍റെ കൂട്ടുകെട്ടിൽ ഹാരി ബ്രൂക്ക് 32 റൺസ് നേടി.