വാഷിങ്ടണ്‍:ഇന്ത്യയിലെ മത സ്വതന്ത്ര്യത്തില്‍ ആശങ്ക രേഖപ്പെടുത്തി അമേരിക്കയിലെ രാജ്യാന്തര മത സ്വാതന്ത്ര്യ സംഘടന. വിദ്വേഷ പ്രസംഗങ്ങളും മതസ്ഥാപനങ്ങള്‍ പൊളിക്കലും മതംമാറ്റ നിരോധന നിയമങ്ങളും സംബന്ധിച്ച ആരോപണങ്ങൾ ചൂണ്ടിക്കാട്ടിയാണ് യുസിഐആര്‍എഫ് ആശങ്കകള്‍ പങ്കുവച്ചിരിക്കുന്നത്. ഇന്ത്യ നിരന്തരം വിമര്‍ശിക്കുന്ന അമേരിക്കന്‍ കമ്മീഷനാണിത്. ഇവര്‍ എല്ലാ വര്‍ഷവും ലോകത്തെ എല്ലാ രാജ്യങ്ങളിലെയും മതസ്വാതന്ത്ര്യത്തെക്കുറിച്ച് സര്‍വെ നടത്തി റിപ്പോര്‍ട്ട് പുറത്ത് വിടാറുണ്ട്. 200 രാജ്യങ്ങളിലാണിവര്‍ സര്‍വെ നടത്തുന്നത്.
നരേന്ദ്ര മോദി സര്‍ക്കാര്‍ മൂന്നാം വട്ടവും അധികാരത്തിലേറെ ദിവസങ്ങള്‍ പിന്നിടുമ്പോഴാണ് ഇക്കുറി ഈ റിപ്പോര്‍ട്ട് പുറത്ത് വന്നിരിക്കുന്നത്. ഉന്നത സാങ്കേതിക മേഖലകളില്‍ ഇന്ത്യയുമായുള്ള ബന്ധം ശക്തിപ്പെടുന്നത് സംബന്ധിച്ച് ഇന്ത്യയും അമേരിക്കയും തമ്മില്‍ അടുത്തിടെ ധാരണയിലെത്തിയിരുന്നു. വൈറ്റ് ഹൗസിലെ ദേശീയ സുരക്ഷ ഉപദേശകന്‍ ജാക്ക് സള്ളിവന്‍റെ ഡല്‍ഹി സന്ദര്‍ശനവേളയിലായിരുന്നു ഈ ധാരണ.
ഇന്ത്യയില്‍ വര്‍ദ്ധിച്ച് വരുന്ന മതപരിവര്‍ത്തന നിരോധന നിയമം, വിദ്വേഷ പ്രസംഗം, മതന്യൂനപക്ഷങ്ങളുടെ വീടുകളും ആരാധനാലയങ്ങളും തകര്‍ക്കല്‍ തുടങ്ങിയവയില്‍ തങ്ങള്‍ക്ക് വലിയ ആശങ്കയുണ്ടെന്ന് അമേരിക്കന്‍ വിദേശകാര്യസെക്രട്ടറി ആന്‍റണി ബ്ലിങ്കന്‍ മാധ്യമപ്രവര്‍ത്തകരോട് പറഞ്ഞു.
ഇന്ത്യയിലെ സ്ഥിതിഗതികളില്‍ രാജ്യാന്തര മതസ്വാതന്ത്ര്യ അമേരിക്കന്‍ സ്ഥാനപതി റഷാദ് ഹുസൈനും ആശങ്ക പ്രകടിപ്പിച്ചു. ഇന്ത്യയില്‍ ക്രൈസ്‌തവ സമൂഹത്തിന് നേരെ വലിയ തോതില്‍ ആക്രമണങ്ങള്‍ അരങ്ങേറുന്നുണ്ട്. പ്രാദേശിക പൊലീസിന്‍റെ പിന്തുണയോടെ ജനങ്ങള്‍ ആരാധനാലയങ്ങളും മറ്റും തകര്‍ക്കുന്നു. മതപരിവര്‍ത്തനം നടത്തുന്നുവെന്നാരോപിച്ചാണ് നടപടികളെന്നും അദ്ദേഹം കുറ്റപ്പെടുത്തി. വെറുതെ നില്‍ക്കുന്നവരെ പോലും ജനക്കൂട്ടം മതപരിവര്‍ത്തനത്തിന്‍റെ പേര് പറഞ്ഞ് ആക്രമിക്കുന്നു. അതിന് ശേഷം ഇരകളെ തന്നെ അറസ്‌റ്റ് ചെയ്യുന്നുവെന്നും അദ്ദേഹം ആരോപിച്ചു.