ലോകമെമ്പാടുമുള്ള ഹിന്ദുക്കളെ സംരക്ഷിക്കുമെന്ന് ട്രംപ്; ഇന്ത്യ-അമേരിക്ക ബന്ധം ശക്തിപ്പെടുത്തുമെന്നും വാഗ്‌ദാനം, ലക്ഷ്യം വോട്ട് ബാങ്ക്

ലോകമെമ്പാടുമുള്ള ഹിന്ദുക്കളുടെ മനുഷ്യാവകാശങ്ങൾ സംരക്ഷിക്കുമെന്നും തീവ്ര ഇടതുപക്ഷത്തിന്‍റെ മതവിരുദ്ധ അജണ്ടയിൽ നിന്ന് അവരെ സംരക്ഷിക്കുമെന്നും വാഗ്‌ദാനം ചെയ്‌ത റിപ്പബ്ലിക്കൻ പ്രസിഡന്‍റ് സ്ഥാനാർഥിയും മുൻ പ്രസിഡിന്‍റുമായ ഡൊണാൾഡ് ട്രംപ്.

വാഷിങ്‌ടൺ: യുഎസിലെയും ബംഗ്ലാദേശിലെയും ഉൾപ്പെടെ ലോകമെമ്പാടുമുള്ള ഹിന്ദുക്കളുടെ മനുഷ്യാവകാശങ്ങൾ സംരക്ഷിക്കുമെന്നും തീവ്ര ഇടതുപക്ഷത്തിന്‍റെ മതവിരുദ്ധ അജണ്ടയിൽ നിന്ന് അവരെ സംരക്ഷിക്കുമെന്നും വാഗ്‌ദാനം ചെയ്‌ത റിപ്പബ്ലിക്കൻ പ്രസിഡന്‍റ് സ്ഥാനാർഥിയും മുൻ പ്രസിഡിന്‍റുമായ ഡൊണാൾഡ് ട്രംപിനെ അമേരിക്കയിലെ ഹിന്ദു വിശ്വാസി കൂട്ടായ്‌മ അഭിനന്ദിച്ചു.

വ്യാഴാഴ്‌ച ദീപാവലി ആശംസകൾ നേർന്ന ട്രംപ്, ബംഗ്ലാദേശിൽ ഹിന്ദുക്കൾക്കും ക്രിസ്ത്യാനികൾക്കും മറ്റ് ന്യൂനപക്ഷങ്ങൾക്കും എതിരായ നടക്കുന്ന ക്രൂരമായ അക്രമങ്ങളെ ശക്തമായി അപലപിച്ചിരുന്നു. ഇത് "ആകെ അരാജകത്വത്തിൽ" തുടരുകയാണെന്നും അദ്ദേഹം പറഞ്ഞു. താനായിരുന്നു അമേരിക്കൻ പ്രസിഡന്‍റെങ്കില്‍ ഇത്തരം ആക്രമണങ്ങള്‍ ഒരിക്കലും നടക്കില്ലായിരുന്നുവെന്നും ട്രംപ് വ്യക്തമാക്കി.

'എന്‍റെ നിരീക്ഷണത്തിലാണെങ്കില്‍ ഇത്തരം ആക്രമണങ്ങള്‍ ഒരിക്കലും സംഭവിക്കില്ലായിരുന്നു. കമലയും ജോയും അമേരിക്കയിലെയും ലോകത്തിലെയും ഹിന്ദുക്കളെ അവഗണിച്ചു. അവര്‍ ഇസ്രായേലിലും യക്രെയ്‌നിലും നമ്മുടെ സ്വന്തം ദക്ഷിണ അതിർത്തിയിലും ഒരു ദുരന്തമായി തീര്‍ന്നു, പക്ഷേ ഞങ്ങൾ അമേരിക്കയെ വീണ്ടും ശക്തിപ്പെടുത്തുകയും സമാധാനം തിരികെ കൊണ്ടുവരുകയും ചെയ്യും,' എന്ന് അദ്ദേഹം പറഞ്ഞു.

ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.

താൻ വീണ്ടും അധികാരത്തില്‍ എത്തിയാല്‍ ഇന്ത്യയുമായുള്ള ബന്ധം ശക്തിപ്പെടുത്തുമെന്നും ട്രംപ് പറഞ്ഞു. 'തീവ്ര ഇടതുപക്ഷത്തിന്‍റെ മതവിരുദ്ധ അജണ്ടയ്‌ക്കെതിരെ ഞങ്ങൾ അമേരിക്കയിലെ ഹിന്ദുക്കളെ സംരക്ഷിക്കും. നിങ്ങളുടെ സ്വാതന്ത്ര്യത്തിനായി ഞങ്ങൾ പോരാടും. എന്‍റെ ഭരണത്തിന് കീഴിൽ ഇന്ത്യയുമായും എന്‍റെ നല്ല സുഹൃത്തുമായ പ്രധാനമന്ത്രി നരേന്ദ്ര മോദിയുമായുള്ള ബന്ധം ഞങ്ങൾ ശക്തിപ്പെടുത്തും,' എന്നും ട്രംപ് വ്യക്തമാക്കി.

'നന്ദിയുള്ളവരായിരിക്കും', ട്രംപിനെ അഭിനന്ദിച്ച് ഹിന്ദുസ് ഫോർ അമേരിക്ക

ഇതിന് പിന്നാലെ ട്രംപിന് നന്ദി അറിയിച്ച് ഹിന്ദുസ് ഫോർ അമേരിക്ക ഫസ്റ്റ് സ്ഥാപകനും ചെയർമാനുമായ ഉത്സവ് സന്ദുജ രംഗത്തെത്തി. 'പ്രസിഡന്‍റ് ട്രംപിനോട് ഞാൻ വളരെ നന്ദിയുള്ളവനാണ്, എന്നേക്കും ഞങ്ങള്‍ നന്ദിയുള്ളവരായിരിക്കും. കമല ഹാരിസ് ഈ വിഷയത്തെക്കുറിച്ച് ഒന്നും പറയാത്തത് ഖേദകരമാണ്. ഈ തെരഞ്ഞെടുപ്പിൽ വലിയ മാറ്റമുണ്ടാകുമെന്ന് ഞാൻ കരുതുന്നു,' എന്നും സന്ദുജ പറഞ്ഞു.

ലോകമെമ്പാടുമുള്ള ഹിന്ദുക്കള്‍ക്ക് ഐക്യദാര്‍ഢ്യം പ്രഖ്യാപിച്ച ട്രംപിനെ സന്ദുജ വാനോളം പുകഴ്‌ത്തി. 'ട്രംപ് ഒരു മഹാനായ വ്യക്തിയാണ്, ഒരു മഹാനായ നേതാവാണ്, എല്ലാ ഹിന്ദുക്കൾക്കും ബുദ്ധമതക്കാർക്കും ജൈന സിഖുകാർക്കും വളരെ അനുഗ്രഹീതമായ ദീപാവലി ആശംസിച്ചതിന്‍റെ മുഴുവൻ ക്രെഡിറ്റും അദ്ദേഹത്തിനാണ്. ട്രംപ് ഈ കമ്മ്യൂണിറ്റികളെ ശരിക്കും ശ്രദ്ധിക്കുന്നുണ്ടെന്ന് ഞാൻ കരുതുന്നു. ബംഗ്ലാദേശിൽ എന്താണ് സംഭവിക്കുന്നതെന്ന് ട്രംപ് ശരിക്കും മനസിലാക്കി. ഹിന്ദുക്കൾക്കെതിരെ നടക്കുന്ന പീഡനങ്ങൾ അദ്ദേഹം തുറന്നുകാണിക്കുന്നു. ബംഗ്ലാദേശിലെ മതന്യൂനപക്ഷങ്ങളെക്കുറിച്ച് അദ്ദേഹത്തിന് ആശങ്കയുണ്ട്,' എന്നും സന്ദുജ പറഞ്ഞു.

അതേസമയം, ട്രംപിന്‍റെ ലക്ഷ്യം അമേരിക്കയിലെ ഹിന്ദു വോട്ട് ബാങ്കാണെന്ന പ്രചാരണം ശക്തമാണ്. 2016 ലെ കണക്കുപ്രകാരം 34 ലക്ഷത്തോളം ഹിന്ദുക്കളാണ് അമേരിക്കയിലുള്ളത്. ഇന്ത്യൻ വംശജരായ അമേരിക്കക്കാരെ ഒരു പ്രധാന വോട്ടുബാങ്കായാണ് ട്രംപ് കാണുന്നത്. നവംബര്‍ 5 ന് നടക്കുന്ന അമേരിക്കൻ പ്രസിഡന്‍റ് തെരഞ്ഞെടുപ്പില്‍ മുഴുവൻ ഹിന്ദു വോട്ടും സമാഹരിക്കുകയാണ് ട്രംപിന്‍റെ ലക്ഷ്യം.