കേപ്‌ടൗണ്‍: ദക്ഷിണാഫ്രിക്കയിലെ ലിംപോപോ പ്രവിശ്യയിൽ ഈസ്റ്റർ കോൺഫറൻസിന് പോവുകായിയുന്ന ബസ് 164 അടി താഴ്‌ചയുള്ള പാറക്കെട്ടിലേക്ക് മറിഞ്ഞ് അപകടം. അപകടത്തില്‍ ബസിലെ യാത്രക്കാരായ 45 പേര്‍ മരിച്ചപ്പോള്‍ എട്ട് വയസുകാരി മാത്രമാണ് രക്ഷപ്പെട്ടത്. ഗുരുതരമായി പരിക്കേറ്റ കുട്ടിയെ എയർലിഫ്റ്റ് ചെയ്‌താണ് പുറത്തെടുത്തത്.
അയൽരാജ്യമായ ബോട്സ്വാനയുടെ തലസ്ഥാനമായ ഗാബോറോണിൽ നിന്ന് ഈസ്റ്റർ സമ്മേളനത്തിനായി പള്ളിയിലേക്ക് പോയ തീർഥാടകരാണ് മരിച്ചതെന്ന് ദക്ഷിണാഫ്രിക്ക ബ്രോഡ്‌കാസ്‌റ്റിങ് കോർപ്പറേഷൻ (എസ്എബിസി) അറിയിച്ചു. മൊകോപനെയ്ക്കും മാർക്കനും ഇടയിലുള്ള മമത്‌ലകല പർവതപാതയിലാണ് അപകടമുണ്ടായത്. 50 മീറ്റർ താഴ്‌ചയിലേക്ക് പതിച്ചതിനെ തുടര്‍ന്ന് ബസിന് തീപിടിച്ചതായാണ് റിപ്പോർട്ട്. കൊല്ലപ്പെട്ട യാത്രക്കാരുടെ മൃതദേഹങ്ങൾ വീണ്ടെടുക്കാനുള്ള ശ്രമങ്ങൾ തുടരുകയാണ്.