ദെയ്‌ര്‍ അല്‍ ബലാഹ്:ഹമാസ് കൈമാറുന്ന ബന്ദികളുടെ പട്ടിക കൈമാറാതെ വെടിനിര്ത്തല് കരാര്‍ നടപ്പാകില്ലെന്ന് ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹു. പ്രാദേശിക സമയം രാവിലെ 8.30, അതായത് ഇന്ത്യന്‍ സമയം ഉച്ചയ്ക്ക് 12.30നായിരുന്നു വെടിനിര്ത്തല് തുടങ്ങേണ്ടിയിരുന്നത്. ഇതിന് തൊട്ടുമുമ്പാണ് പിന്മാറ്റ പ്രഖ്യാപനവുമായി നെതന്യാഹു രംഗത്ത് എത്തിയത്. തൊട്ടുപിന്നാലെ ഗാസയില്‍ ഇസ്രയേല്‍ ആക്രമണവും അഴിച്ച് വിട്ടു. ഇസ്രയേല്‍ നടത്തിയ വ്യോമാക്രമണത്തില്‍ എട്ടുപേരാണ് കൊല്ലപ്പെട്ടത്. 20 പേര്‍ക്ക് പരിക്കേറ്റിട്ടുണ്ട്.
ഹമാസ് തങ്ങൾ കൈമാറുന്ന ബന്ദികളുടെ പട്ടിക കൈമാറുന്നത് വൈകിപ്പിച്ചതാണ് ഇസ്രയേലിനെ പ്രകോപിപ്പിച്ചത്. പിന്മാറ്റ പ്രഖ്യാപനത്തിനും വ്യോമാക്രമണത്തിനും തൊട്ടുപിന്നാലെ ഹമാസ് കൈമാറുന്ന പട്ടിക കൈമാറി. മൂന്ന് പേരുടെ പട്ടികയാണ് കൈമാറിയത്. സാങ്കേതിക കാരണങ്ങള്‍ ചൂണ്ടിക്കാട്ടിയാണ് ഹമാസ് പട്ടിക കൈമാറുന്നത് വൈകിപ്പിച്ചത്. കഴിഞ്ഞാഴ്‌ച പ്രഖ്യാപിച്ച വെടിനിര്ത്തല് കരാര്‍ നടപ്പാക്കാന്‍ തങ്ങള്‍ ബാധ്യസ്ഥരാണെന്ന് ഹമാസ് വ്യക്തമാക്കിയിരുന്നു.
ഇന്ന് തന്നെ മൂന്ന് ബന്ദികളെ കൈമാറാമെന്നാണ് ഹമാസ് വ്യക്തമാക്കിയിരുന്നത്. പകരം ഇസ്രയേലില്‍ തടവില്‍ കഴിയുന്ന നിരവധി പലസ്‌തീനികളെ മോചിപ്പിക്കണമെന്നായിരുന്നു ധാരണ. ഇതോടെ പതിനഞ്ച് മാസം നീണ്ട യുദ്ധത്തിന് അന്ത്യം ആകുമെന്ന കണക്കുകൂട്ടലിലായിരുന്നു ലോകം.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
42 ദിവസത്തെ വെടിനിര്ത്തല് കരാര്‍ നിലവില്‍ വരുന്നതോടെ 33 ബന്ദികളെ ഹമാസ് കൈമാറുമെന്നായിരുന്നു ധാരണ. പകരം ഇസ്രയേലില്‍ കഴിയുന്ന നൂറ് കണക്കിന് പലസ്‌തീന്‍ തടവുകാരെ മോചിപ്പിക്കുമെന്നും. ഗാസയില്‍ നിന്ന് ഇസ്രയേല്‍ സേന പിന്‍മാറുമെന്നും വ്യക്തമാക്കിയിരുന്നു. ഇതോടെ പലായനം ചെയ്‌ത നിരവധി പലസ്‌തീനികള്‍ക്ക് തിരികെ വരാനുള്ള സാഹചര്യവും ഒരുങ്ങിയേനെ. തകര്‍ക്കപ്പെട്ട മേഖലയില്‍ നിരവധിയിടങ്ങളില്‍ നിന്ന് ജീവകാരുണ്യ പ്രവര്‍ത്തനങ്ങള്‍ എത്തിത്തുടങ്ങിയിട്ടുണ്ട്.
ഒരു കൊല്ലം മുമ്പ് ആരംഭിച്ച മധ്യസ്ഥ ശ്രമങ്ങളുടെ തുടര്‍ച്ചയാണ് ഇത്.