ദേർ അൽ-ബലാഹ്:ഗാസ മുനമ്പിൽ ഇസ്രയേൽ നടത്തിയ വ്യോമാക്രമണത്തില്‍ 25 പേര്‍ കൊല്ലപ്പെട്ടു. അഭയാര്‍ഥികള്‍ കഴിഞ്ഞിരുന്ന സെൻട്രല്‍ ഗാസ മുനമ്പിലെ നുസെറാത്ത് ക്യാമ്പിലെ തപാൽ കേന്ദ്രത്തിന് നേരെയാണ് ആക്രമണമുണ്ടായത്. ആക്രമണത്തില്‍ 50ല്‍ അധികം പേര്‍ക്ക് പരിക്കേറ്റതായും റിപ്പോര്‍ട്ടുകളുണ്ട്.
ആക്രമണത്തില്‍ പ്രദേശത്തെ കെട്ടിടങ്ങള്‍ക്കും കേടുപാടുകള്‍ സംഭവിച്ചിട്ടുണ്ട്. സംഭവത്തില്‍ പ്രതികരണം നടത്താൻ ഇസ്രയേല്‍ സൈന്യം തയ്യാറായിട്ടില്ല.
1948ലെ യുദ്ധത്തിന് പിന്നാലെ ഗാസ മുനമ്പില്‍ പലസ്‌തീൻ അഭയാര്‍ഥികള്‍ക്ക് വേണ്ടി ആരംഭിച്ച എട്ട് ക്യാമ്പുകളില്‍ ഒന്നാണ് നുസെറാത്തിലേത്. കുടിയൊഴിപ്പിക്കപ്പെട്ട നിരവധിയാളുകളാണ് ഈ പ്രദേശത്ത് തിങ്ങിപ്പാര്‍ക്കുന്നത്.
ഇവിടെയുണ്ടായ ആക്രമണത്തിന് പിന്നാലെ 25 പേരുടെ മൃതദേഹങ്ങള്‍ വടക്ക് അൽ-അവ്ദ ഹോസ്‌പിറ്റലിലേക്കും അൽ-അഖ്‌സ ആശുപത്രിയിലേക്കുമാണ് മാറ്റിയത്. ആക്രമണത്തില്‍ പരിക്കേറ്റവരില്‍ ഭൂരിഭാഗവും കുട്ടികളാണെന്ന് ആശുപത്രി അധികൃതര്‍ അറിയിച്ചു.