വാഷിംഗ്‌ടണ്‍ : അമേരിക്കന്‍ പ്രസിഡന്‍റ് തെരഞ്ഞെടുപ്പില്‍ റിപ്പബ്ലിക്കന്‍ പാര്‍ട്ടിയുടെ സ്ഥാനാര്‍ത്ഥിത്വത്തിനായി ന്യൂഹാംപ്ഷെയറില്‍ നടന്ന പ്രൈമറിയിലും മുന്‍ പ്രസിഡന്‍റ് ഡൊണാള്‍ഡ് ട്രംപിന് തന്നെ വിജയം. ട്രംപിന് 53 ശതമാനം വോട്ടുകള്‍ ലഭിച്ചു. തൊട്ടുപിന്നിലുള്ള നിക്കി ഹാലിക്ക് 46 ശതമാനത്തില്‍ താഴെയാണ് വോട്ട് (US President nomination).
കഴിഞ്ഞയാഴ്‌ച ഇയാവോയില്‍ നടന്ന പ്രൈമറിയില്‍ നേടിയ വിജയത്തിന് പിന്നാലെയാണ് ന്യൂഹാംപ്ഷെയറും ട്രംപിന് വിജയം സമ്മാനിച്ചിരിക്കുന്നത്(Donald Trump wins New Hampshire primary). അവിടെയും ട്രംപിന് അന്‍പത് ശതമാനത്തിലേറെ വോട്ടുകള്‍ ലഭിച്ചിരുന്നു. രണ്ട് സംസ്ഥാനങ്ങളിലെ വിജയത്തോടെ പാര്‍ട്ടി സ്ഥാനാര്‍ത്ഥിത്വം ട്രംപ് ഏറെക്കുറെ ഉറപ്പിച്ചെന്ന് പറയാം(Nikki defies trumps call to exit race).
അതേസമയം വിജയത്തില്‍ ട്രംപിന് അഭിനന്ദനവുമായി എത്തിയ ഐക്യരാഷ്ട്രസഭയുടെ മുന്‍ അമേരിക്കന്‍ പ്രതിനിധി കൂടിയായ നിക്കി ഹാലി മത്സരം അവസാനിച്ചിട്ടില്ലെന്ന് പ്രതികരിച്ചു. അടുത്ത പോരാട്ടം സൗത്ത് കരോലിനയിലാണ്. അവിടെ രണ്ട് തവണ ഗവര്‍ണര്‍ ആയിരുന്ന വ്യക്തി കൂടിയാണ് ഹാലി. അതുകൊണ്ടുതന്നെ ആ സംസ്ഥാനം തന്നെ കൈവിടില്ലെന്ന ആത്മവിശ്വാസത്തിലാണ് അവര്‍. ഈ മത്സരം അവസാനിക്കാന്‍ ഇനിയും സമയമുണ്ടെന്നും അവര്‍ പറഞ്ഞു. ഇത് തുടക്കം മാത്രമാണ്. ഇനിയും ഏറെ സംസ്ഥാനങ്ങള്‍ അവശേഷിക്കുന്നുണ്ട്. അടുത്തത് തന്‍റെ പ്രിയ കരോലിനയാണെന്നും അവര്‍ പറഞ്ഞു.
ന്യൂഹാംപ്‌ഷെയര്‍ പ്രൈമറി നിക്കിക്ക് ഏറെ നിര്‍ണായകമായിരുന്നു. ഇയാവോയില്‍ മൂന്നാം സ്ഥാനത്തായിരുന്നു നിക്കി. ഫ്ളോറിഡ ഗവര്‍ണര്‍ റോണ്‍ ഡി സാന്‍റിഷായിരുന്നു തൊട്ടുമുന്നില്‍. മുന്‍ പ്രസിഡന്‍റ് തന്നെ സ്ഥാനാര്‍ത്ഥിയാകണമെന്നാണ് ഏറെ പേരും ആഗ്രഹിക്കുന്നതെന്നും അതുകൊണ്ട് മത്സരത്തില്‍ നിന്ന് പിന്‍മാറുകയാണെന്നും റോണ്‍ ഡി സാന്‍ഡിസ് വ്യക്തമാക്കിയിരുന്നു.