ന്യൂഡൽഹി : പുതിയ ക്ലേഡ് 1 ബി സ്‌ട്രെയിൻ എംപോക്‌സ് (മങ്കിപോക്‌സ്) ആശങ്കാജനകമാണെന്ന്‌ കണ്ടെത്തല്‍. ശാരീരിക സമ്പർക്കം പുലർത്തുന്ന ആളുകൾക്കിടയിൽ എളുപ്പത്തിൽ പടരുമെന്നും ഇത് കുട്ടികളിൽ പോലും മരണനിരക്ക് വർധിപ്പിക്കുമെന്നും വിദഗ്‌ധർ. 2022ൽ ആഗോള പൊട്ടിത്തെറിക്ക് കാരണമായ എംപോക്‌സ് ക്ലേഡ് 2 ബിയിൽ നിന്ന് വ്യത്യസ്‌തമാണ് പുതിയ സ്‌ട്രെയിൻ.
'മധ്യ ആഫ്രിക്കയിലെ ഡെമോക്രാറ്റിക് റിപ്പബ്ലിക് ഓഫ് കോംഗോയിൽ വളരെക്കാലമായി ഇത്തരം എൻഡെമിക് കേസുകൾ കാണുന്നുണ്ട്. കൂടുതൽ മാരകവും പ്രാധാന്യമുള്ളതുമായ എംപോക്‌സ് ക്ലേഡ് 1 പതിറ്റാണ്ടുകളായി അവിടെയുണ്ട്. എന്നാൽ ഇപ്പോൾ പുതിയ വ്യതിയാനങ്ങൾ കാരണം ഇത് കൂടുതൽ പകരാൻ സാധ്യതയുണ്ടെ'ന്ന്‌ പകർച്ചവ്യാധി വിദഗ്‌ധൻ ഡോ ഈശ്വർ ഗിലാഡ പറഞ്ഞു.