ടൊവിനോ തോമസ് ട്രിപ്പിള്‍ റോളില്‍ എത്തുന്ന ചിത്രമാണ് 'അജയന്‍റെ രണ്ടാം മോഷണം'. ഓണം റിലീസായാണ് ചിത്രം തിയേറ്ററുകളിലേക്ക് എത്തുന്നത്. സിനിമയുടെ പ്രസ്‌മീറ്റില്‍ വികാരാധീനനായി ടൊവിനോ തോമസ് സംസാരിച്ചതാണ് ഇപ്പോള്‍ സോഷ്യല്‍ മീഡിയയില്‍ ശ്രദ്ധനേടുന്നത്. സിനിമയുടെ പിന്നിലെ കഷ്‌ടപ്പാടുകളെ കുറിച്ചും അതിജീവിച്ച പ്രതിസന്ധികളെ കുറിച്ചും ഓര്‍ത്തെടുത്തപ്പോഴാണ് ടൊവിനോയുടെ വാക്കുകള്‍ ഇടറിയത്.
'ഒരുപാട് വെല്ലുവിളികള്‍ ആ സിനിമയുടെ ഷൂട്ടിങ് സമയത്ത് ഉണ്ടായിരുന്നു. മാറി നിന്ന് കരഞ്ഞിട്ടുണ്ട്. തല്ലുകൂടിയിട്ടുണ്ട്. ചിരിച്ചിട്ടുണ്ട് എല്ലാം ഇപ്പോള്‍ മനോഹരമായ ഓര്‍മ്മയാണ്.' -എന്ന് പറയുമ്പോഴാണ് ടൊവിനോയുടെ കണ്ണ് നനഞ്ഞത്. ആ സമയത്തൊക്കെ ഏറ്റവും വലിയ പിന്തുണ തന്നത് തിരക്കഥാകൃത്തായ സുജിത്ത് ആയിരുന്നുവെന്നും ടൊവിനോ പറഞ്ഞു.
'നല്ല ചൂട് ഉള്ളപ്പോഴും നല്ല തണുപ്പ് ഉള്ളപ്പോഴും ഒട്ടും സൗകര്യം ഇല്ലാതെയുമൊക്കെ ഞങ്ങള്‍ക്ക് ഷൂട്ട് ചെയ്യേണ്ടി വന്നിട്ടുണ്ട്. അന്നൊക്കെ നമ്മള്‍ സിനിമയെടുക്കാന്‍ ഇറങ്ങിയിരിക്കുന്നുവെന്ന് ഒരു സംഘം ആളുകള്‍ ഒരേ മനസോടെ പറഞ്ഞതുകൊണ്ടും പ്രവര്‍ത്തിച്ചതുകൊണ്ടും മാത്രമാണ് ഈ സിനിമ സംഭവിച്ചത്. സുജിത്തേട്ടന്‍ ആയിരുന്നു എന്‍റെ ഏറ്റവും വലിയ സപ്പോര്‍ട്ട്.
തുടക്കം മുതല്‍ ഗംഭീര പ്രതിസന്ധികള്‍ ഉണ്ടായിരുന്നു. ഇപ്പോള്‍ ആലോചിക്കുമ്പോള്‍ തമാശയാണ്. അന്നൊക്കെ ഞങ്ങള്‍ ഒരുമിച്ച് കരഞ്ഞിട്ടുണ്ട്. തല്ല് കൂടിയിട്ടുണ്ട്, ചിരിച്ചിട്ടുണ്ട്. എന്‍റെ ചുറ്റും ഉണ്ടായിരുന്നവരൊക്കെ സുഹൃത്തുക്കള്‍ ആയിരുന്നു. എല്ലാവരും നല്ല പണിയെടുത്തു. ഇവരെ എല്ലാവരെയും ഒരു ചേട്ടന്‍റെ സ്ഥാനത്ത് നിന്ന് പിന്തുണച്ചത് സുജിത്തേട്ടന്‍ ആയിരുന്നു.' -ടൊവിനോ പറഞ്ഞു.