ദുല്‍ഖര്‍ സല്‍മാന്‍ നായകനായി എത്തിയ 'ലക്കി ഭാസ്കര്' ആഗോളതലത്തില്‍ 109 കോടി രൂപ മുകളില്‍ കളക്ഷന്‍ നേടി വിജയകരമായി പ്രദര്‍ശനം തുടരുകയാണ്. നാലാം വാരത്തിലും മികച്ച ബുക്കിങ് ആണ് കേരളം, തമിഴ്‌നാട്, തെലുഗാന സംസ്ഥാനങ്ങളില്‍ നിന്ന് ലഭിക്കുന്നത്. വെങ്കി അറ്റ്ലൂരി സംവിധാനം ചെയ്‌ത ലക്കി ഭാസ്കര് ഒരേ സമയം തെലുഗു, മലയാളം, തമിഴ്, ഹിന്ദി എന്നീ ഭാഷകളിലാണ് റീലീസ് ചെയ്തത്.
ലക്കി ഭാസ്കര് ദുല്‍ഖര്‍ സല്‍മാന്‍റെ കരിയറിലെ ഏറ്റവും വലിയ ഹിറ്റായി മാറിയിരിക്കുകയാണ്. കേരളത്തില്‍ മാത്രം 20 കോടി ഗ്രോസ് കളക്ഷന്‍ നേടിയ ഈ ചിത്രം തമിഴ്നാട്ടിലും ബ്ലോക്ക്ബസ്‌റ്റര്‍ വിജയമാണ് നേടുന്നത്.സിനിമ റിലീസായി ഇരുപത്തിയഞ്ച് ദിവസങ്ങള്‍ പിന്നിട്ടിട്ടും തമിഴ്‌നാട്ടില്‍ മികച്ച പ്രേക്ഷക പ്രതികരണത്തോടെ പ്രദര്‍ശനം തുടരുകയാണ്. തമിഴ്‌നാട്ടില്‍ നിന്ന് മാത്രം 15.95 കോടി രൂപയ്ക്ക് മുകളിലാണ് ചിത്രം സ്വന്തമാക്കിയിരിക്കുന്നത്. സോളോ ഹീറോ ആയി അന്യഭാഷ ചിത്രത്തിലൂടെ തമിഴ്‌നാട്ടില്‍ ആദ്യമായി 15 കോടിക്ക് മുകളില്‍ നേടുന്ന മലയാള താരമായി ഇതോടെ ദുല്‍ഖര്‍ മാറി. കര്‍ണാടകയില്‍ 6.66 കോടി രൂപയ്ക്ക് മുകളില്‍ കളക്ഷന്‍ നേടി. തെലുഗാന സംസ്ഥാനങ്ങളില്‍ നിന്ന് 35. 67 കോടി രൂപയാണ് ചിത്രം സ്വന്തമാക്കിയിരിക്കുന്നത്.
ഇന്ത്യയില്‍ നിന്ന് മാത്രം ചിത്രത്തിന് 68.45 കോടി രൂപയ്ക്ക് മുകളില്‍ നേടാന്‍ സാധിച്ചു. സൂര്യയുടെ ബ്രഹ്മാണ്ഡചിത്രം കങ്കുവയുടെ റിലീസ് ലക്കി ഭാസ്കറിന്റെ ബോക്‌സ് ഓഫീസ് കുതിപ്പിനെ ബാധിക്കുമോ എന്ന ആശങ്കയിലായിരുന്നു നിർമാതാക്കൾ. എന്നാൽ, അതൊന്നും ലക്കി ഭാസ്കറിന്റെ കളക്ഷനെ ബാധിച്ചിട്ടില്ല. ലക്കി ഭാസ്കര് നാലാം ആഴ്‌ചയിലും കേരളത്തില്‍ മാത്രം പ്രദര്‍ശിപ്പിക്കുന്നത് 125ഓളം സ്‍ക്രീനുകളില്‍ ആണ്.
ലക്കി ഭാസ്കര് ഒടിടിയില്‍
ചിത്രത്തിന്റെ ഒടിടി റിലീസിനായും പ്രേക്ഷകര്‍ കാത്തിരിക്കാന്‍ തുടങ്ങിയിട്ട് ഏറെ നാളുകളായി. നെറ്റ്ഫ്ലിക്സിലൂടെ നവംബർ 28 ന് ചിത്രം സ്ട്രീമിങ് ആരംഭിക്കും. 30 കോടി രൂപയ്ക്ക് ചിത്രത്തിന്റെ ഒടിടി ഡീൽ നെറ്റ്ഫ്ലിക്‌സ് ഉറപ്പിച്ചുവെന്ന് നേരത്തെ റിപ്പോർട്ടുകൾ ഉണ്ടായിരുന്നു. തെലുഗ്, തമിഴ്, മലയാളം, കന്നഡ, ഹിന്ദി ഭാഷകളിൽ ചിത്രം സ്ട്രീമിംഗ് ആരംഭിക്കും. വെഫേറർ ഫിലിംസിന്റെ ഒഫീഷ്യൽ പേജിലൂടെയാണ് ഇക്കാര്യം അറിയിച്ചിരിക്കുന്നത്.