ജൂനിയര്‍ എന്‍ ടി ആര്‍ ചിത്രം ദേവര പാര്‍ട്ട് വണിനായുള്ള കാത്തിരിപ്പിലാണ് ആരാധകര്‍. സെപ്റ്റംബര്‍ 27 ന് ചിത്രം തിയേറ്ററുകള്‍ എത്താനിരിക്കെ അഡ്വാന്‍സ് ടിക്കറ്റ് ബുക്കിങ്ങിലൂടെ ബോക്‌സ് ഓഫീസില്‍ 50 കോടി കടന്നിരിക്കുകയാണ്. അതിവേഗമാണ് ടിക്കറ്റുകള്‍ വിറ്റഴിയുന്നത്. ആദ്യ ദിനം മള്‍ട്ടിപ്ലക്‌സുകള്‍ക്ക് 413 രൂപയും സിംഗിള്‍ സ്‌ക്രീനുകള്‍ക്ക് 295 രൂപയുമായാണ് നിശ്ചിയിച്ചിരിക്കുന്നത്. രണ്ടാം ദിവസം മുതല്‍ യഥാക്രമം 354 രൂപയായും 206.50 രൂപയായും കുറയും.
ഇന്ത്യയില്‍ നിന്ന് മാത്രം 28 കോടിയാണ് ചിത്രം അഡ്വാന്‍സ് ബുക്കിങ്ങിലൂടെ സ്വന്തമാക്കിയിരിക്കുന്നത്. ആറ് ലക്ഷം ടിക്കറ്റുകളാണ് എല്ലാ ഭാഷകളില്‍ നിന്നുമായി ഇതുവരെ വിറ്റഴിച്ചത്. അഡ്വാന്‍സ് ബുക്കിങ്ങ് 100 കോടി കടക്കുമെന്നാണ് സൂചന.
കൊരട്ടല ശിവയും ജൂനിയര്‍ എന്‍ ടി ആറും 'ജനത ഗ്യാരേജി'ന് ശേഷം ഒന്നിക്കുന്ന ചിത്രമാണിത്. ജാന്‍വി കപൂറാണ് നായികയായി എത്തുന്നത്. ജാന്‍വിയുടെ ആദ്യ തെലുങ്ക് ചിത്രം കൂടിയാണ് 'ദേവര'. സെയ്‌ഫ് അലിഖാനും ചിത്രത്തില്‍ പ്രധാന വേഷത്തില്‍ എത്തുന്നുണ്ട്. യുവസുധ ആര്‍ട്ട്സും എന്‍ടിആര്‍ ആര്‍ട്‌സും ചേര്‍ന്ന് നിര്‍മിക്കുന്ന ചിത്രം നന്ദമുരി കല്യാണ്‍ റാം ആണ് അവതരിപ്പിക്കുന്നത്.
പ്രകാശ് രാജ്, ശ്രീകാന്ത് മേക്ക, ഷൈന്‍ ടോം ചാക്കോ, നരേന്‍ തുടങ്ങി ഒട്ടനവധി അഭിനേതാക്കള്‍ ചിത്രത്തില്‍ പ്രധാന വേഷത്തില്‍ എത്തുന്നുണ്ട്. 'ദേവര'യുടെ കേരള വിതരണാവകാശം സ്വന്തമാക്കിയിരിക്കുന്നത് ദുല്‍ഖര്‍ സല്‍മാന്‍റെ വേഫറര്‍ ഫിലിംസാണ്. സംഗീത സംവിധാനം: അനിരുദ്ധ്, ഛായാഗ്രഹണം: രത്നവേലു ഐ എസ് സി, പ്രൊഡക്ഷന്‍ ഡിസൈനർ: സാബു സിറിള്‍, എഡിറ്റർ: ശ്രീകര്‍ പ്രസാദ് തുടങ്ങിയവരാണ് സിനിമയുടെ മറ്റു അണിയറപ്രവർത്തകർ.