ബിജു മേനോൻ, ആസിഫ് അലി എന്നിവരെ കേന്ദ്ര കഥാപാത്രങ്ങളാക്കി സംവിധായകൻ ജിസ് ജോയ് ഒരുക്കിയ ചിത്രമാണ് 'തലവൻ'. പ്രേക്ഷകര്‍ ഏറെ പ്രതീക്ഷയോടെയാണ് ഈ ചിത്രത്തിനായി കാത്തിരിക്കുന്നത്. ഇപ്പോഴിതാ സിനിമയുടെ റിലീസ് തീയതി ഔദ്യോഗികമായി പ്രഖ്യാപിച്ചിരിക്കുകയാണ് അണിയറ പ്രവർത്തകർ.
മെയ് 24ന് 'തലവൻ' തിയേറ്ററുകളില്‍ എത്തും. ചിത്രത്തിന്‍റെ പുതിയ പോസ്റ്റർ പുറത്തുവിട്ടാണ് അണിയറ പ്രവർത്തകർ റിലീസ് തീയതി പ്രഖ്യാപിച്ചത്. 'ഫീൽ ഗുഡ് സിനിമ നിർമാതാ'വെന്ന ലേബലിൽ നിന്നും കളം മാറ്റിച്ചവിട്ടിയ ജിസ് ജോയ് 'തലവനി'ൽ എന്താണ് ഒളിപ്പിച്ച് വച്ചിരിക്കുന്നതെന്ന് അറിയാൻ കൗതുകപൂർവം കാത്തിരിക്കുകയാണ് ആരാധകർ.
ഒപ്പം ബിജു മേനോൻ - ആസിഫ് അലി കൂട്ടുകെട്ടും പ്രേക്ഷകരുടെ പ്രതീക്ഷകളേറ്റുന്നു. ഒന്നിച്ചപ്പോഴെല്ലാം മികച്ച വിജയം സ്വന്തമാക്കിയ ഈ കോംബോ ഇത്തവണയും നിരാശപ്പെടുത്തില്ലെന്ന് തന്നെയാണ് പ്രേക്ഷക പ്രതീക്ഷ. രണ്ട് വ്യത്യസ്‌ത റാങ്കുകളിലുള്ള പൊലീസ് ഓഫിസർമാർക്ക് ഇടയിലുണ്ടാകുന്ന പ്രശ്‌നങ്ങളാണ് ഈ ചിത്രം പ്രേക്ഷകർക്ക് മുന്നിൽ അവതരിപ്പിക്കുന്നത്.
ത്രില്ലർ മൂഡിലാണ് ഈ ചിത്രം അണിയിച്ചൊരുക്കിയിരിക്കുന്നത് എന്നാണ് വിവരം. പ്രധാനമായും മലബാറിലെ നാട്ടിൻപുറങ്ങൾ പശ്ചാത്തലമാക്കുന്ന ഈ ഇൻവെസ്റ്റിഗേറ്റീവ് ത്രില്ലർ ചിത്രം അരുൺ നാരായൺ പ്രൊഡക്ഷൻസിന്‍റെയും ലണ്ടൻ സ്റ്റുഡിയോസിന്‍റെയും ബാനറുകളില്‍ അരുൺ നാരായൺ, സിജോ സെബാസ്റ്റ്യൻ എന്നിവർ ചേർന്നാണ് നിർമിച്ചിരിക്കുന്നത്. 'ഈശോ', 'ചാവേർ' എന്നീ ചിത്രങ്ങൾക്ക് ശേഷം അരുൺ നാരായൺ പ്രൊഡക്ഷൻസ് നിർമിക്കുന്ന സിനിമ കൂടിയാണ് തലവൻ.
അനുശ്രീ, മിയ, ദിലീഷ് പോത്തൻ, കോട്ടയം നസീർ, ശങ്കർ രാമകൃഷ്‌ണൻ, ജോജി കെ ജോൺ, ദിനേശ്, അനുരൂപ്, നന്ദൻ ഉണ്ണി, ബിലാസ് എന്നിവരാണ് 'തലവൻ' സിനിമയിൽ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. ആനന്ദ് തേവരക്കാട്ട്, ശരത് പെരുമ്പാവൂർ എന്നിവര്‍ ചേര്‍ന്നാണ് ഈ സിനിമയ്‌ക്കായി തിരക്കഥ ഒരുക്കിയത്. ശരൺ വേലായുധൻ ഛായാഗ്രാഹകനായ ചിത്രത്തിന്‍റെ എഡിറ്റിങ് നിര്‍വഹിക്കുന്നത് സൂരജ് ഇ എസ് ആണ്.
കലാസംവിധാനം - അജയൻ മങ്ങാട്, മേക്കപ്പ് - റോണക്‌സ്‌ സേവ്യർ, കോസ്റ്റ്യൂം - ജിഷാദ്, സൗണ്ട് - രംഗനാഥ് രവി, ചീഫ് അസോസിയേറ്റ് ഡയറക്‌ടർ - സാഗർ, അസോസിയേറ്റ് ഡയറക്‌ടേഴ്‌സ് - അഭിജിത്ത് കെ എസ്, ഫർഹാൻസ് പി ഫൈസൽ, പ്രൊഡക്ഷൻ മാനേജർ - ജോബി ജോൺ, പ്രൊഡക്ഷൻ എക്‌സിക്യുട്ടീവ് - ഷെമീജ് കൊയിലാണ്ടി, പ്രൊഡക്ഷൻ കൺട്രോളർ - ആസാദ് കണ്ണാടിക്കൽ, ഡിജിറ്റൽ മാർക്കറ്റിംഗ് - അനൂപ് സുന്ദരൻ, പിആർഒ - വാഴൂർ ജോസ്, ആതിര ദിൽജിത്ത്.
ALSO READ:ന്യൂ തഗ് ഇൻ ടൗൺ; 'തഗ് ലൈഫി'ൽ കമൽഹാസനോടൊപ്പം ചിമ്പുവും, വീഡിയോ വൈറൽ
