അനൂപ് മേനോൻ, ധ്യാൻ ശ്രീനിവാസൻ, ഷീലു എബ്രഹാം എന്നിവരെ പ്രധാന കഥാപാത്രങ്ങളാക്കി മനോജ് പാലോടൻ സംവിധാനം ചെയ്യുന്ന പുതിയ സിനിമയുടെ ടൈറ്റിൽ മോഷൻ പോസ്റ്റർ പുറത്ത്. കാലാവസ്ഥ നിരീക്ഷണ കേന്ദ്രത്തിന്‍റെ പശ്ചാത്തലത്തിൽ ഹ്യൂമറിന് പ്രാധാന്യം നൽകി ഒരുക്കുന്ന ഈ ചിത്രത്തിന് 'ഇടീം മിന്നലും' എന്നാണ് പേര് നൽകിയിരിക്കുന്നത്. അബാം മൂവീസിന്‍റെ ബാനറിൽ ഷീലു എബ്രഹാമാണ് 'ഇടീം മിന്നലും' പ്രേക്ഷകർക്ക് മുന്നിൽ അവതരിപ്പിക്കുന്നത്. എബ്രഹാം മാത്യുവാണ് നിർമാണം.
അബാം മൂവിസിന്‍റെ പതിനാലാമത് ചിത്രം കൂടിയാണ് 'ഇടീം മിന്നലും'. കൃഷ്‌ണ പൂജപ്പുരയാണ് ഈ ചിത്രത്തിന്‍റെ തിരക്കഥ രചിച്ചത്. ഏറെ നാളുകൾക്ക് ശേഷമാണ് കൃഷ്‌ണ പൂജപ്പുരയുടെ തിരക്കഥയിൽ ഒരു ചിത്രമെത്തുന്നത് എന്നതും ശ്രദ്ധേയം. എറണാകുളത്തും പരിസര പ്രദേശങ്ങളിലുമായാണ് 'ഇടീം മിന്നലും' സിനിമയുടെ ഷൂട്ടിംഗ് പൂർത്തീകരിച്ചത്. കാലാവസ്ഥ നിരീക്ഷണ കേന്ദ്രത്തിലെ ഉദ്യോഗസ്ഥരും അവരുടെ ജീവിതത്തിൽ സംഭവിക്കുന്ന ചില കാര്യങ്ങളും നർമത്തിൽ ചാലിച്ചാണ് ഈ സിനിമയിലൂടെ പ്രേക്ഷകർക്ക് മുന്നിൽ എത്തിക്കുന്നത്.