ജൂനിയര്‍ എന്‍ ടി ആര്‍ നായകനാകുന്ന 'ദേവര പാര്‍ട്ട് 1' റിലീസിന് ഇനി മണിക്കൂറുകള്‍ മാത്രം ബാക്കി നില്‍ക്കെ ആരാധകര്‍ ഏറെ ആകാംക്ഷയിലാണ്. 'ജനത ഗ്യാരേജി'ന് ശേഷം കൊരട്ടല ശിവ സംവിധാനം ചെയ്യുന്ന 'ദേവര പാര്‍ട്ട് 1' സെപ്റ്റംബര്‍ 27 ന് തിയേറ്ററുകളിലേക്ക് എത്തുമ്പോള്‍ അത് ആഘോഷമാക്കാന്‍ ഒരുങ്ങുകയാണ് ആരാധക കൂട്ടം.
കഴിഞ്ഞ ദിവസം ചിത്രത്തെ കുറിച്ച് സംഗീത സംവിധാകന്‍ അനിരുദ്ധ് രവിചന്ദര്‍ സോഷ്യല്‍ മീഡിയയില്‍ കുറിച്ച ഒരു ഷോര്‍ട്ട് റിവ്യൂ ആണ് ഇപ്പോള്‍ ശ്രദ്ധ നേടുന്നത്. 'ദേവര' എന്നെഴുതികൊണ്ട് ട്രോഫികള്‍, കയ്യടികള്‍, വെടിക്കെട്ട് ഇമോജികളാണ് അനിരുദ്ധ് പങ്കുവച്ചത്. ഈ റിവ്യൂ പങ്കുവച്ചതോടെ ഇത് ആഘോഷമാക്കിയിരിക്കുകയാണ് ആരാധകര്‍. ഇതിന് മുന്‍പ് ഇത്തരത്തില്‍ പങ്കുവച്ച ലിയോ, ജവാന്‍, ജയിലര്‍ എന്നീ ചിത്രങ്ങളും വമ്പന്‍ ഹിറ്റായിരുന്നു.
അതേസമയം ചിത്രത്തിന്‍റെ അഡ്വാന്‍സ് ബുക്കിങ്ങ് റെക്കോര്‍ഡിട്ടിരിക്കുകയാണ്. ബോക്‌സ് ഓഫിസില്‍ 100 കോടി കടക്കുമെന്നാണ് സൂചന. അതിവേഗത്തിലാണ് ടിക്കറ്റുകള്‍ വിറ്റഴിയുന്നത്. തെലുങ്ക്, തമിഴ്, മലയാളം, ഹിന്ദി ഭാഷകളിലാണ് ചിത്രം തിയേറ്ററുകളില്‍ എത്തുന്നത്. ബോളിവുഡ് താരം ജാന്‍വി കപൂറാണ് നായിക. സെയ്‌ഫ് അലിഖാന്‍ മറ്റൊരു പ്രധാന വേഷത്തില്‍ എത്തുന്നുണ്ട്.