സിനിമാപ്രേമികൾ ഏറെ ആവേശത്തോടെ കാത്തിരിക്കുന്ന ചിത്രമാണ് അല്ലു അർജുനെ നായകനാക്കി സുകുമാർ സംവിധാനം നിർവഹിക്കുന്ന ‘ പുഷ്‌പ 2: ദി റൂൾ’. ചിത്രത്തിന്‍റെ ആദ്യ ഭാഗത്തില്‍ ‘ഊ ആണ്ടവാ’ ഡാന്‍സ് നമ്പറിലൂടെ സാമന്തയാണ് ആരാധകരെ കയ്യിലെടുത്തതെങ്കില്‍ ഇക്കുറി പുഷ്‌പരാജിനോടൊപ്പം ആടിത്തിമിര്‍ത്തത് തെലുങ്കിലെ ഡാന്‍സിങ് ക്വീന്‍ ശ്രീലീലയാണ്. ആരാധകരെ ആവേശം കൊള്ളിക്കുന്ന തരത്തിലുള്ളതാണ് കിസിക് ഗാനം.
അടുത്തിടെ പുറത്തിറങ്ങിയ ഐറ്റം നമ്പറിന്‍റെ പ്രൊമോ വീഡിയോ ആരാധകര്‍ ഏറെ ആകാംക്ഷയോടെയാണ് ഏറ്റെടുത്തിരുന്നത്. 17 സെക്കന്‍റ് മാത്രം ദൈര്‍ഘ്യമുള്ള പ്രൊമോ വീഡിയോ ഇതിനോടകം തന്നെ വണ്‍ മില്യനിലേറെ പ്രേക്ഷകരാണ് കണ്ടത്. ഇതോടെ പാട്ടിന്‍റെ പൂര്‍ണ പതിപ്പിന് വേണ്ടി കാത്തിരിക്കുകയായിരുന്നു ആരാധകര്‍. ഗാനം പുറത്തെത്തിയതോടെ ശ്രീലീലയുടെ പ്രകടനം മിന്നിക്കുന്നതാണ് എന്നാണ് ആരാധകര്‍ അഭിപ്രായപ്പെടുന്നത്.
ലോതിക, സുഭലഷിണി എന്നിവര്‍ ചേര്‍ന്നാണ് കിസിക് ഗാനം ആലപിച്ചിരിക്കുന്നത്. ദേവി ശ്രീ പ്രസാദാണ് ഗാനം ഒരുക്കിയിരിക്കുന്നത്. ആദ്യഭാഗത്തിലെ ഗാനം പോലെ ഈ ഗാനവും ഹിറ്റ് ചാർട്ടുകളിൽ ഇടം നേടുമെന്നാണ് അണിയറപ്രവർത്തകരുടെയും അല്ലു ആരാധകരുടെയും പ്രതീക്ഷ. അതേസമയം ഗാനത്തിന്‍റെ ചിത്രീകരണത്തിനിടെ പുറത്തു വന്ന ചിത്രങ്ങളൊക്കെ ഇതിനോടകം തന്നെ സോഷ്യല്‍ മീഡിയയിലൊക്കെ തരംഗമായിരുന്നു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.