ബദൗണ്‍ (ഉത്തർപ്രദേശ്) : ഉത്തർപ്രദേശിലെ ബദൗണിലെ ബാബ കോളനിയിൽ ചൊവ്വാഴ്‌ച (19-03-2024) രണ്ട് കുട്ടികൾ വെട്ടേറ്റു മരിച്ചതായി പൊലീസ് പറഞ്ഞു (Two Children Hacked To Death In Badaun). കുട്ടികളെ കൊലപ്പെടുത്തിയവരില്‍ ഒരാൾ പൊലീസുമായുള്ള ഏറ്റുമുട്ടലിൽ കൊല്ലപ്പെട്ടു (Accused Killed In Encounter).
'ഇന്നലെ (19-03-2024) വൈകുന്നേരം നിർഭാഗ്യകരമായ ഒരു സംഭവം നടന്നു, രണ്ട് കുട്ടികൾ കൊല്ലപ്പെട്ടു. സംഭവമറിഞ്ഞ ഉടൻ തന്നെ പൊലീസ് സംഭവസ്ഥലത്തെത്തി. പ്രതി രക്ഷപ്പെടാൻ ശ്രമിവെങ്കിലും ഞങ്ങൾ പ്രതിയെ പിന്തുടർന്നു.
അക്രമി പൊലീസിന് നേരെ വെടിയുതിർക്കുകയും തുടർന്നുണ്ടായ ഏറ്റുമുട്ടലില്‍ കൊല്ലപ്പെടുകയും ചെയ്‌തു. സംഭവത്തില്‍ പൊലീസ് കേസ് അന്വേഷിക്കുകയാണെ'ന്ന് ബറേലി ഇൻസ്പെക്‌ടർ ജനറൽ ഓഫ് പൊലീസ് രാകേഷ് കുമാർ മാധ്യമങ്ങളോട് പറഞ്ഞു.
കുട്ടികൾ ടെറസിൽ കളിക്കുകയായിരുന്നുവെന്നും, പ്രതികൾ വന്ന് കുറച്ച് നേരം കാത്തുനിന്ന ശേഷം ടെറസിൽ കയറി അവരെ കൊലപ്പെടുത്തുകയായിരുന്നുവെന്നും കൊലപാതകത്തെ കുറിച്ച് ഐ ജി പറഞ്ഞു. 'പ്രതിക്ക് 25-30 വയസ് പ്രായമാണുള്ളത്, കൂടുതൽ അന്വേഷണത്തിന് ശേഷം അവരുടെ വിശദാംശങ്ങൾ ഞങ്ങൾ വെളിപ്പെടുത്തും' എന്നും രാകേഷ് കുമാർ പറഞ്ഞു.
കൊലപാതകത്തിൽ രണ്ട് പേർ ഉൾപ്പെട്ടിട്ടുണ്ടെന്നും എന്തുകൊണ്ടാണ് ഈ സംഭവം നടന്നതെന്ന് അവർക്ക് ഇപ്പോഴും അറിയില്ലെന്നും മരിച്ച കുട്ടിയുടെ പിതാവ് പറഞ്ഞു. 'പ്രതി ഓടി രക്ഷപ്പെടാൻ ശ്രമിക്കുകയായിരുന്നു, പക്ഷേ പൊലീസ് പ്രതിയെ പിടികൂടി. അവിടെ രണ്ട് പേരുണ്ടായിരുന്നു, ഞങ്ങൾ അവരുമായി മുമ്പ് ഇടപഴകിയിരുന്നില്ലെ'ന്നും പിതാവ് പറഞ്ഞു.