ചെന്നൈ:തമിഴ്‌നാട്ടിൽ സംസ്ഥാന സർക്കാർ പൗരത്വ ഭേദഗതി നിയമം നടപ്പാക്കില്ലെന്ന് മുഖ്യമന്ത്രി എംകെ സ്റ്റാലിൻ. ബഹുസ്വരത, മതേതരത്വം, ന്യൂനപക്ഷ സമുദായങ്ങളുടെയും ശ്രീലങ്കൻ തമിഴ് അഭയാർത്ഥികളുടെയും അവകാശങ്ങൾ തകർക്കുന്ന പൗരത്വ നിയമം നടപ്പിലാക്കാന്‍ തന്‍റെ സർക്കാർ അനുവദിക്കില്ലെന്ന് എംകെ സ്റ്റാലിൻ പറഞ്ഞു.
ലോക്‌സഭാ തെരഞ്ഞെടുപ്പ് അടുത്തിരിക്കെ നിയമങ്ങൾ തിടുക്കത്തിൽ അറിയിക്കുന്നതിന് കേന്ദ്രത്തിലെ ബിജെപി ഭരണത്തെ എംകെ സ്റ്റാലിൻ വിമർശിച്ചു. പൗരത്വ ഭേദഗതി നിയമം ബഹുസ്വരതയും മതേതരത്വവും ഉൾപ്പെടെയുള്ള ഭരണഘടനയുടെ അടിസ്ഥാന തത്വങ്ങൾക്ക് വിരുദ്ധവും ഉപയോഗശൂന്യവുമാണെന്ന്‌ അദ്ദേഹം പറഞ്ഞു.
പൗരത്വ ഭേദഗതി നിയമം ഇന്ത്യൻ ജനങ്ങൾക്കിടയിൽ ഭിന്നത സൃഷ്‌ടിക്കാൻ മാത്രമേ സഹായിക്കൂ, വ്യക്തമായ ആനുകൂല്യങ്ങളൊന്നും നൽകുന്നില്ല. ഇത് റദ്ദാക്കപ്പെടേണ്ട നിയമമാണെന്നും എംകെ സ്റ്റാലിൻ പ്രസ്‌താവനയിൽ പറഞ്ഞു.
സംസ്ഥാനത്ത് പൗരത്വ നിയമം നടപ്പാക്കാൻ തമിഴ്‌നാട് സർക്കാർ അനുവദിക്കില്ലെന്നും അത് പിൻവലിക്കണമെന്നും ഭരണകക്ഷിയായ ഡിഎംകെ പാർട്ടിയെ നയിക്കുന്ന എംകെ സ്റ്റാലിൻ ആവശ്യപ്പെട്ടു. എല്ലാ പൗരന്മാരുടെയും അവകാശങ്ങളും താൽപ്പര്യങ്ങളും സംരക്ഷിക്കാൻ സർക്കാർ പ്രതിജ്ഞാബദ്ധമാണെന്നും അദ്ദേഹം പറഞ്ഞു.
2021 ൽ ഡിഎംകെ അധികാരത്തിൽ വന്നപ്പോൾ പൗരത്വ ഭേദഗതി നിയമം റദ്ദാക്കാനും രാജ്യത്തിന്‍റെ സാമൂഹിക ഐക്യം സംരക്ഷിക്കാനും ഭരണഘടനയിൽ പ്രതിപാദിച്ചിരിക്കുന്ന മതേതരത്വത്തിന്‍റെ ആദർശം സംരക്ഷിക്കാനും കേന്ദ്ര സർക്കാരിനോട് ആവശ്യപ്പെടുന്ന പ്രമേയം പാസാക്കിയതായി സ്റ്റാലിൻ തന്‍റെ എക്‌സ് ഹാൻഡിലിലൂടെ പങ്കുവെച്ചു.
'പൗരത്വ ഭേദഗതി നിയമം അഴിച്ചുവിട്ടതിന് ഇന്ത്യയിലെ ജനങ്ങൾ ബിജെപിയോട് ഒരിക്കലും പൊറുക്കില്ല, അതിനെ ലജ്ജയില്ലാതെ പിന്തുണച്ച എഡിഎംകെ, ജനങ്ങൾ അവർക്ക് ഉചിതമായ പാഠം പഠിപ്പിക്കും', അദ്ദേഹം എക്‌സില്‍ കുറിച്ചു.
അതേസമയം, മക്കൾ നീതി മയ്യം സ്ഥാപകൻ കമൽഹാസനും അടുത്തിടെ തന്‍റെ രാഷ്‌ട്രീയ പാർട്ടിയായ തമിഴക വെട്രിക് കഴകം ആരംഭിച്ച നടൻ വിജയും പൗരത്വ ഭേദഗതി നിയമത്തെയും അത് നടപ്പാക്കുന്നതിനെയും ശക്തമായി എതിർത്തു. പൗരത്വ ഭേദഗതി പോലുള്ള നിയമം നടപ്പാക്കുന്നത് അംഗീകരിക്കാനാവില്ലെന്ന് തമിഴിൽ പുറത്തിറക്കിയ പ്രസ്‌താവനയിൽ വിജയ് പങ്കുവെച്ചിരുന്നു.
