കല്‍പ്പറ്റ:വയനാട് ലോക്‌സഭാ മണ്ഡലത്തിലെ യുഡിഎഫ് സ്ഥാനാർഥിയും കോൺഗ്രസ് ജനറൽ സെക്രട്ടറിയുമായ പ്രിയങ്ക ഗാന്ധി പ്രചാരണത്തിനായി വയനാട്ടിലേക്ക്. തിങ്കൾ, ചൊവ്വ ദിവസങ്ങളിൽ ജില്ലയിലുടനീളം വോട്ടഭ്യര്‍ഥിക്കുന്നതിന്‍റെ ഭാഗമായാണ് പ്രിയങ്ക വീണ്ടും വയനാട്ടിലെത്തുന്നത്. തെരഞ്ഞെടുപ്പ് പ്രചാരണങ്ങള്‍ക്കായി ഡല്‍ഹിയില്‍ നിന്നും തിരിച്ച പ്രിയങ്ക 11.20 ഓടെ വയനാട്ടിലെത്തും.
റോഡ് മാര്‍ഗം മൈസൂരിലെത്തുന്ന പ്രിയങ്ക, തുടര്‍ന്ന് ഹെലികോപ്‌റ്ററിലാകും വയനാട്ടിലെത്തുക. മണ്ഡലത്തിലെത്തുന്ന പ്രിയങ്ക ഗാന്ധിക്ക് ഇന്നും ഉജ്ജ്വല സ്വീകരണമാണ് കോണ്‍ഗ്രസ് പ്രവര്‍ത്തകര്‍ ഒരുക്കിയിട്ടുള്ളത്. മീനങ്ങാടിയിലെ നീലഗിരി കോളജ് ഓഫ് ആർട്‌സ് ആൻഡ് സയൻസിൽ നിന്ന് പ്രിയങ്ക ഗാന്ധിയുടെ ഇന്നത്തെ പ്രചാരണം ആരംഭിക്കും. മീനങ്ങാടിയിലെ പൊതുയോഗവും തുടർന്ന് ഉച്ചയ്ക്ക് രണ്ടരയ്ക്ക് പനമരത്തെ പൊതുയോഗവുമാണ് ഇന്നത്തെ പ്രധാന പരിപാടികള്‍. വൈകിട്ട് 4.30ന് പൊഴുതനയിൽ നടക്കുന്ന മറ്റൊരു പൊതുയോഗത്തോടെ ഇന്നത്തെ പ്രചാരണം സമാപിക്കും.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
രണ്ടാം ദിനമായ ചൊവ്വാഴ്‌ച രാവിലെ 9.30-ന് തിരുവമ്പാടിയിൽ പ്രസംഗം തുടങ്ങി ഈങ്ങാപ്പുഴയിലെ സമ്മേളനത്തോടെ പ്രിയങ്ക പ്രചാരണം തുടരും. ഉച്ചയ്ക്ക് 12:30-ന് ഏറനാട്ടില്‍ പൊതുയോഗം സംഘടിപ്പിക്കും. ഉച്ചകഴിഞ്ഞ്, 3 മണിക്ക് വണ്ടൂരിലും മമ്പാടും സദസുകളെ അഭിസംബോധന ചെയ്യും. വൈകിട്ട് 4:30-ന് നിലമ്പൂരിൽ നടക്കുന്ന സമ്മേളനത്തിന് ശേഷം ചുങ്കത്തറയിലും പ്രചാരണം നടത്തും.