ഇലക്‌ടറൽ ബോണ്ടുകൾ അസാധുവാക്കുന്നത് കൂടുതൽ സുതാര്യതയിലേക്ക് നയിക്കും: അമർത്യ സെൻ

നൊബേൽ സമ്മാന ജേതാവും സാമ്പത്തിക വിദഗ്‌ധനുമായ അമർത്യ സെൻ ഇലക്‌ടറൽ ബോണ്ട് പദ്ധതിയെക്കുറിച്ചുള്ള സുപ്രീം കോടതിയുടെ തീരുമാനത്തെ സ്വാഗതം ചെയ്‌തു. ഈ നീക്കം ജനങ്ങൾക്കിടയിൽ കൂടുതൽ സുതാര്യത അനുവദിക്കുമെന്നും സെൻ.

കൊൽക്കത്ത (പശ്ചിമ ബംഗാൾ) : ഇലക്‌ടറൽ ബോണ്ട് പദ്ധതി അസാധുവാക്കിയുള്ള സുപ്രീം കോടതി വിധിയെ സ്വാഗതം ചെയ്‌ത്‌ പ്രമുഖ സാമ്പത്തിക വിദഗ്‌ധനും നൊബേൽ സമ്മാന ജേതാവുമായ അമർത്യ സെൻ (Amartya Sen On Electoral Bond Scheme). തെരഞ്ഞെടുപ്പ് പശ്ചാത്തലത്തിൽ ജനങ്ങൾക്കിടയിൽ കൂടുതൽ സുതാര്യത കൈവരിക്കാൻ ഈ നീക്കം വഴിയൊരുക്കുമെന്ന് അമർത്യ സെൻ മാധ്യമങ്ങളോട്‌ വ്യക്തമാക്കി.

'ഇലക്‌ടറൽ ബോണ്ടുകൾ ഒരു അഴിമതിയായിരുന്നു, അവ ഇപ്പോൾ ഒഴിവാക്കിയതിൽ ഞാൻ സന്തോഷിക്കുന്നു. ഇത് സംസാര സ്വാതന്ത്ര്യത്തിനും അഭിപ്രായ സ്വാതന്ത്ര്യത്തിനുമുള്ള ഭരണഘടനാപരമായ അവകാശങ്ങളും വിവരാവകാശവും ലംഘിക്കുന്നു. ഈ നീക്കം തെരഞ്ഞെടുപ്പ് സന്ദർഭത്തിൽ ആളുകൾ പരസ്‌പരം നൽകുന്ന പിന്തുണയിൽ കൂടുതൽ സുതാര്യത അനുവദിക്കുമെന്നും സെൻ പറഞ്ഞു.

അഭിപ്രായ സ്വാതന്ത്ര്യത്തിന്‍റെയും ഭരണഘടന അവകാശങ്ങളുടെയും വിവരാവകാശത്തിന്‍റെയും ലംഘനങ്ങൾ ചൂണ്ടിക്കാട്ടി സുപ്രീം കോടതി ഇലക്‌ടറൽ ബോണ്ട് സ്‌കീം അസാധുവാക്കി. രാഷ്‌ട്രീയ പാർട്ടികൾ പണമിടപാട് നടത്തുന്ന ഓരോ ഇലക്‌ടറൽ ബോണ്ടിന്‍റെയും വിശദാംശങ്ങൾ തെരഞ്ഞെടുപ്പ് കമ്മിഷനോട് വെളിപ്പെടുത്താൻ സ്റ്റേറ്റ് ബാങ്ക് ഓഫ് ഇന്ത്യയോട് (എസ്ബിഐ) സുപ്രീം കോടതി നിർദേശിച്ചു. ഈ വിവരങ്ങളിൽ പണമിടപാട് തീയതിയും ബോണ്ടുകളുടെ മൂല്യവും ഉൾപ്പെടുത്തുകയും മാർച്ച് 6 നകം പോൾ പാനലിന് സമർപ്പിക്കുകയും വേണം.

പ്രതിപക്ഷ പാർട്ടികളോട് സർക്കാർ എങ്ങനെ പെരുമാറുന്നു എന്നതിനെ ആശ്രയിച്ചാണ് രാജ്യത്തെ തെരഞ്ഞെടുപ്പ് സമ്പ്രദായത്തെ സ്വാധീനിക്കുന്നതെന്ന് സാമ്പത്തിക വിദഗ്‌ധൻ പറഞ്ഞു. 'പ്രതിപക്ഷ പാർട്ടികളോടും സർക്കാർ നിയന്ത്രണങ്ങൾ പാലിക്കാൻ ആഗ്രഹിക്കുന്നവയോടും ഉള്ള പെരുമാറ്റം ഇതിനെ സ്വാധീനിക്കുന്നു. പൗരന്മാരുടെ സംസാര സ്വാതന്ത്ര്യത്തിനും പ്രവർത്തനത്തിനും പുറമേ കഴിയുന്നത്ര സ്വതന്ത്രമായ തെരഞ്ഞെടുപ്പ് സമ്പ്രദായം ഞങ്ങൾ ആഗ്രഹിക്കുന്നതായും അദ്ദേഹം പറഞ്ഞു.

ഇന്ത്യൻ ഭരണഘടന എല്ലാ പൗരന്മാർക്കും കാര്യമായ രാഷ്‌ട്രീയ സ്വാതന്ത്ര്യം നൽകാൻ ആഗ്രഹിക്കുന്നുവെന്നും ഒരു സമുദായത്തിന്‌ പ്രത്യേക പദവി ഉണ്ടായിരിക്കാൻ ആഗ്രഹിക്കുന്നില്ലെന്നും സെൻ ഊന്നിപ്പറഞ്ഞു. മുതിർന്ന കോൺഗ്രസ് നേതാവും മുൻ ധനമന്ത്രിയുമായ പി ചിദംബരവും ഇലക്‌ടറൽ ബോണ്ട് സ്‌കീം റദ്ദാക്കാനുള്ള സുപ്രീം കോടതിയുടെ തീരുമാനത്തെ പ്രശംസിച്ചു. ഇത് സുതാര്യതയുടെ വലിയ വിജയമാണെന്ന് പറഞ്ഞു.