പത്തനംതിട്ട: മകരവിളക്ക് തീർഥാടനത്തിനായി ശബരിമല ക്ഷേത്ര നട തുറന്നതിന് ശേഷമുള്ള കളഭാഭിഷേകവും നെയ്യഭിഷേകവും ഇന്ന് (ഡിസംബർ 31) നടന്നു. ശബരിമല സന്നിധാനത്തെ ഏറ്റവും പ്രധാനപ്പെട്ട വഴിപാടുകളിലൊന്നാണ് കളഭാഭിഷേകവും നെയ്യഭിഷേകവും. ആദ്യത്തെ കളഭാഭിഷേകം ഉച്ചപൂജയ്‌ക്ക് മുമ്പായി 12 മണിക്ക് നടന്നു.
നെയ്യഭിഷേകം പുലര്‍ച്ചെ 3.30ന് തുടങ്ങി 7 വരെയും തുടർന്ന് രാവിലെ 8 മുതൽ 11 വരെയും നടന്നു. തന്ത്രി കണ്‌ഠരര് ബ്രഹ്മദത്തൻ്റെ കാർമികത്വത്തിൽ പൂജിച്ച ശേഷം കളഭാഭിഷേകത്തിനുള്ള കളഭകുംഭവുമായി മേൽശാന്തി എസ് അരുൺകുമാർ നമ്പൂതിരി വാദ്യഘോഷങ്ങളുടെ അകമ്പടിയോടെ ശ്രീകോവിലിനുചുറ്റും പ്രദക്ഷിണം വച്ചു. തുടർന്നാണ് കളഭാഭിഷേകം നടത്തിയത്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
നെയ്യഭിഷേകം നടത്തിയ ശേഷം ശ്രീകോവിലിൽ നിന്ന് ലഭിക്കുന്ന നെയ്യ് ദിവ്യപ്രസാദമായി അയ്യപ്പ ഭക്തർ സ്വീകരിച്ചു. ജനുവരി 19 വരെയാണ് തീർഥാടകർക്ക് നെയ്യഭിഷേകത്തിന് അവസരം ലഭിക്കുന്നത്. ജനുവരി 20ന് രാവിലെ നട അടയ്‌ക്കും. ദേവസ്വം ബോർഡ്‌ മെമ്പർ അജികുമാർ, അഡ്‌മിനിസ്ട്രേറ്റീവ് ഓഫീസർ ബിജു വി.നാഥ്‌ തുടങ്ങിയവരും ചടങ്ങുകളില്‍ സന്നിഹിതരായിരുന്നു.
Read More: മകരവിളക്ക് മഹോത്സവം; ശബരിമല നട തുറന്നു
