ശ്രീനഗര്‍ : ജമ്മു കശ്‌മീരിലെ പുൽവാമയില്‍ ഇന്ന് രാവിലെ ഭീകരരും സുരക്ഷ സേനയും തമ്മിൽ ഏറ്റുമുട്ടി. പുൽവാമ ജില്ലയിലെ നിഹാമ പ്രദേശത്താണ് ഏറ്റുമുട്ടലുണ്ടായത്. പൊലീസും സുരക്ഷ സേനയും പ്രദേശത്ത് പരിശോധനയിലാണെന്നും കൂടുതൽ വിവരങ്ങൾ പിന്നാലെ നല്‍കുമെന്നും എക്‌സ് പോസ്റ്റിലൂടെ കശ്‌മീർ സോൺ പൊലീസ് അറിയിച്ചു.
പ്രത്യേക വിവരത്തിന്‍റെ അടിസ്ഥാനത്തില്‍ ഇന്ത്യൻ സൈന്യവും കശ്‌മീർ പൊലീസും ചേർന്ന് കുപ്‌വാരയിൽ സംയുക്ത തെരച്ചിൽ നടത്തിയിരുന്നു. 'ഓപ്പറേഷൻ കോട് നല' എന്ന് പേരിട്ട തെരച്ചിലില്‍ ആയുധങ്ങളുടെയും വെടിക്കോപ്പുകളുടെയും മറ്റ് ഉപകരണങ്ങളുടെയും വന്‍ ശേഖരം കണ്ടെത്തി. ഭീകരരുടെ ഒരു ഒളിത്താവളം കണ്ടെത്തുകയും അത് തകർക്കുകയും ചെയ്‌തതായാണ് ലഭിക്കുന്ന വിവരം.